Shavkat Mirziyoyev BAAga jo‘nab ketdi

Shavkat Mirziyoyev 15-may kuni Birlashgan Arab Amirliklarining Abu-Dabi shahriga jo‘nab ketdi, deb xabar bermoqda prezident matbuot xizmati.

Davlat rahbari uzoq davom etgan xastalikdan so‘ng 13-may kuni 73 yoshida vafot etgan BAA prezidenti Shayx Xalifa bin Zoid-al Nahayon vafoti munosabati bilan ta’ziya marosimida ishtirok etadi.

Tashrif doirasida kuni kecha BAA Oliy kengashi tomonidan mamlakat prezidenti etib saylangan Abu Dabi amiri Shayx Muhammad bin Zoid-al Nahayon bilan ikki tomonlama uchrashuv o‘tkazish ham rejalashtirilgan.

BAA prezidenti va Abu-Dabi amiri Xalifa ibn Zayd al-Nahayon 2014-yilda insultni va jiddiy operatsiyani boshidan kechirgan. Shundan keyin u omma oldida kamdan kam namoyon bo‘lgan. So‘nggi yillarda BAA prezidenti davlat ishlari bilan deyarli shug‘ullanmasdi, mamlakatni boshqarishni poytaxt amirligi Abu-Dabi valiahd shahzodasi Muhammad ibn Zaydga topshirib qo‘ygandi. U BAA asoschisi Zayd al-Nahayonning to‘ng‘ich o‘g‘li edi.

14-may kuni uning ukasi, Abu-Dabi valiahd shahzodasi shayx Muhammad ibn Zayd Ol-Nahayon mamlakatning yangi prezidenti etib saylandi.