Shavkat Mirziyoyev Birlashgan Arab Amirliklari prezidenti Shayx Xalifa bin Zoid-al Nahayon vafoti munosabati bilan ta’ziya marosimida ishtirok etish uchun Abu-Dabiga jo‘nab ketgandi.
Prezident matbuot kotibi Sherzod Asadov davlat rahbari BAAning yangi prezidenti Muhammad bin Zoid-al Nahayon, tashqi ishlar vaziri Abdulla bin Zoid-al Nahayon hamda bosh vazir o‘rinbosari, prezident ishlari bo‘yicha vazir Mansur bin Zoid-al Nahayon bilan uchrashib, ularga ta’ziya bildirganini ma’lum qildi.
Qayd etilishicha, ta’ziya marosimida Fransiya prezidenti Emmanuel Makron, Buyuk Britaniya bosh vaziri Boris Jonson, Qozog‘iston prezidenti Qosim-Jo‘mart To‘qayev, Turkmaniston xalq maslahati raisi Gurbanguli Berdimuhamedov, Misr prezidenti Abdulfattoh as-Sisi, Pokiston bosh vaziri Shahboz Sharif, Ummon sultoni Haysam bin Toriq, Isroil bosh vaziri Naftali Bennet jami 40 ga yaqin davlat va hukumat rahbarlari qatnashdi.
BAA prezidenti va Abu-Dabi amiri Xalifa ibn Zayd al-Nahayon uzoq davom etgan xastalikdan so‘ng 13-may kuni 73 yoshida vafot etgandi. U 2014-yilda insultni va jiddiy operatsiyani boshidan kechirgan. Shundan keyin u omma oldida kamdan kam namoyon bo‘lgan. So‘nggi yillarda BAA prezidenti davlat ishlari bilan deyarli shug‘ullanmadi, mamlakatni boshqarishni poytaxt amirligi Abu-Dabi valiahd shahzodasi Muhammad ibn Zaydga topshirib qo‘ygandi. U BAA asoschisi Zayd al-Nahayonning to‘ng‘ich o‘g‘li edi.
14-may kuni uning ukasi, Abu-Dabi valiahd shahzodasi shayx Muhammad ibn Zoid-al Nahayon mamlakatning yangi prezidenti etib saylandi.
Izoh (0)