Qozog‘istonda ichida O‘zbekiston fuqarolari bo‘lgan avtobus ag‘darilib ketgani to‘g‘risida xabar berilgandi. O‘zbekiston Tashqi mehnat migratsiyasi agentligi hozirda avtobusdagi barcha yo‘lovchilarning ro‘yxati shakllantirilayotganini ma’lum qildi.
Dastlabki ma’lumotlarga ko‘ra, ushbu hodisa oqibatida 2 kishi vafot etgan (O‘zbekiston fuqarolari), 4 kishi reanimatsiya, 13 kishi esa travmotologiya bo‘limiga joylashtirilgan.
“Hozirgi vaqtda avtobusning barcha yo‘lovchilari ro‘yxati shakllantirilib, hodisa O‘zbekistonning Olmaotadagi bosh konsulxonasi mehnat migratsiyasi masalalari bo‘yicha attashesi tomonidan nazoratga olingan”, — deyiladi munosabatda.
Tashqi ishlar vazirligi rasmiy vakiliga ko‘ra, Nukus—Olmaota yo‘nalishi bo‘yicha harakatlangan avtobusda 53 nafar yo‘lovchi bo‘lgan, ularning 47 nafari — O‘zbekiston fuqarosi.
O‘zbekistonning Olmaotadagi bosh konsulxonasi qoshida jabrlanganlarga yordam ko‘rsatish bo‘yicha ishchi guruh tashkil etildi. Huquqni muhofaza qilish organlar va tibbiyot muassasalari bilan doimiy aloqa o‘rnatilgan. Marhumlarning jasadlarini vatanga olib kelish bilan bog‘liq tashkiliy masalalar hal etilmoqda.
Jambil viloyati Favqulodda vaziyatlar departamentining ma’lum qilinishicha, hodisa 12-may kuni Olmaota—Toshkent avtomobil yo‘lining 571-kilometrida, Jualinskiy tumani “Baurjon Momishuli” qishlog‘idagi yo‘lda sodir bo‘lgan. Avtobus haydovchisi boshqaruvni yo‘qotib, yo‘l bo‘ylab harakatlanayotgan traktor tirkamasi bilan to‘qnashib ketgan.
Izoh (0)