Prezident Shavkat Mirziyoyev ayni paytda Farg‘ona viloyati faollari bilan uchrashmoqda, deb xabar berdi “Daryo” muxbiri.
“Farg‘onada 2021-yili 801 million dollar eksport bo‘lgan ekan. Buning uchun ko‘p ishlar qilindi. Avval 50 millon haqida gapirar edik. Hozir esa milliardlar haqida gapiryapmiz. Albatta, buning uchun aql, bilim kerak”, — deydi davlat rahbari.
Shavkat Mirziyoyev har bir qarorga qo‘l qo‘yishdan avval 10 marta o‘ylashini ham qayd etib o‘tdi.
“Kecha kechqurun bir masala meni qiynadi. Lola opa bugun zalda o‘tirishlari kerak edi. Ammo betob bo‘lib qolibdilar. O‘zim borib ko‘rib kelay desam, shifokorlar bemorni bezovta qilmaslik kerakligini aytishdi. Ko‘nglim juda g‘ash bo‘ldi. Ko‘p shifokorlarni yubordim. Yaratgandan iltijo qilamiz, tez kunlarda sog‘ayib ketib, safimizga qaytsinlar”, — deydi prezident.
Davlat rahbari bugun yig‘ilishda ochiq gaplashilishini aytdi.
“Menga aniq savol qo‘yinglar, savolga bugun bo‘lmasa ham ertaga javob beraman. “Janob prezident, hammasi zo‘r, yest qilamiz” demanglar, savol beringlar. Men Farg‘onadan juda ko‘p narsa kutyapman”, — deydi Shavkat Mirziyoyev.
12-may kuni prezident matbuot kotibi Sherzod Asadov O‘zbekiston Qahramoni, Oltiariq tumanidagi “Nurli obod” fermer xo‘jaligi rahbari Lola Murotova qattiq betob bo‘lib qolgani haqida yozgandi.
Shavkat Mirziyoyevning topshirig‘iga ko‘ra, Shuhrat G‘aniyev, SSV vaziri Behzod Musayev, Prezident maslahatchisi o‘rinbosari Abdurashid Jo‘raboyev va prezident matbuot kotibi Sherzod Asadov viloyat shoshilinch tibbiy yordam markazida davolanayotgan Lola Murotova holidan xabar olgan.
Sherzod Asadovning yozishicha, ayni paytda qator tibbiyot muassasalari direktorlaridan iborat konsilium boshchiligida tajribali shifokorlar tomonidan kerakli muolajalar olib borilmoqda.
Izoh (0)