Xorazm viloyati Urganch shahrida Lada va Isuzu to‘qnashuvi oqibatida ikki kishi halok bo‘lgani to‘g‘risida xabar berilgandi. Viloyat IIB holatga munosabat bildirib, holat bo‘yicha jinoyati ishi qo‘zg‘atilganini ma’lum qildi.
12-may kuni soat 14:30 larda Urganch shahrining Al-Xorazmiy, Sheroziy va G‘afur G‘ulom ko‘chalari tutashgan chorrahada Isuzu avtobusi va Lada-2194 yengil avtomashina ishtirokida og‘ir oqibatli yo‘l-transport hodisasi sodir bo‘lgan.
Svetofor orqali tartibga solinuvchi ushbu chorrahada sodir bo‘lgan yo‘l-transport hodisasi natijasida Isuzu avtobusi yon tomonga ag‘darilishi oqibatida undagi ikki nafar yo‘lovchi olgan og‘ir tan jarohatlari tufayli hodisa joyida vafot etgan.
Shuningdek, avariya oqibatida avtobusning turli darajada tan jarohati olgan yo‘lovchilariga tibbiy yordam ko‘rsatilgan.
Holat yuzasidan jinoyat ishi qo‘zg‘atilib, tergov harakatlari olib borilmoqda.
Avvalroq Toshkentda Spark beton to‘siqqa urilishi oqibatida haydovchi va yo‘lovchi vafot etgani, Navoiyda 25 nafar yo‘lovchi bo‘lgan avtobus ag‘darilib ketgani, Andijonda Nexia-3 bilan to‘qnashgan Tico ikkiga bo‘linib ketgani to‘g‘risida xabar berilgandi.
Izoh (0)