“Hamma davlat xizmatchilari o‘zgarishi kerak. O‘zgarmaydigan odamlarga oramizda joy yo‘q” — Shavkat Mirziyoyev

Farg‘ona viloyatiga tashrifi davomida Uchko‘prik tumanidagi “Yengil sanoat mahsulotlari ishlab chiqarish va logistika markazi”ga borib, hokim yordamchilari bilan suhbatlashdi, deb xabar bermoqda “Daryo” muxbiri.

Davlat rahbari suhbat davomida so‘nggi yillarda bo‘layotgan o‘zgarishlar haqida gapirdi.

“Hozir oddiy insonlardan mahallada o‘zgarish bormi, deb so‘rasam, ular o‘zgarish borligini aytdi. Oddiy odamlar aytyapti. Ularga hech kim bu gaplarni o‘rgatmaganiga ishonaman. Tibbiyotda, ta’limda o‘zgarish bormi, desam, ha deyishyapti. Mahalla kelib ehtiyojmand aholiga yordam berayotganini aytishyapti. Hamma davlat xizmatchilari o‘zgarishi kerak. O‘zgarmaydigan odamlarga oramizda joy yo‘q”, — deydi prezident.

Shavkat Mirziyoyev mahallalarda hokim yordamchilari, yoshlar va xotin-qizlar yetakchilari paydo bo‘lganini alohida qayd etdi.

“Bizning ish uslubimiz — inson qadri uchun. Biz barcha insonlarga manfaatiga xizmat qiladigan ishlarni qilishimiz kerak. Insonlar ishlashi uchun ish joylar yaratib beramiz. Hozir ‘falonchining o‘g‘li’, ‘falonchining jiyani’, degan gap yo‘q. Barchamiz xalq xizmatchisimiz. Yaxshi ishlagan odam o‘z o‘rnida ko‘proq qoladi, rag‘batlantiramiz. Yaxshi ishlamagan odamni esa lavozimida olib qolmaymiz. U xalq xizmatchisi bo‘lmasa ishlamaydi”, — deydi davlat rahbari.

Tashrifini Oltiariq tumanidan boshlagan prezident viloyatda ikki kun — 12—13-may kunlari bo‘ladi. Safar davomida qishloq xo‘jaligi, to‘qimachilik va boshqa tarmoqlardagi korxonalar faoliyati bilan tanishish, mahallalardagi bunyodkorlik ishlarini ko‘zdan kechirish, viloyatni ijtimoiy-iqtisodiy rivojlantirish bo‘yicha yig‘ilish o‘tkazilishi ko‘zda tutilgan.