Фарғона вилоятига ташрифи давомида Учкўприк туманидаги «Енгил саноат маҳсулотлари ишлаб чиқариш ва логистика маркази»га бориб, ҳоким ёрдамчилари билан суҳбатлашди, деб хабар бермоқда «Дарё» мухбири.
Давлат раҳбари суҳбат давомида сўнгги йилларда бўлаётган ўзгаришлар ҳақида гапирди.
«Ҳозир оддий инсонлардан маҳаллада ўзгариш борми, деб сўрасам, улар ўзгариш борлигини айтди. Оддий одамлар айтяпти. Уларга ҳеч ким бу гапларни ўргатмаганига ишонаман. Тиббиётда, таълимда ўзгариш борми, десам, ҳа дейишяпти. Маҳалла келиб эҳтиёжманд аҳолига ёрдам бераётганини айтишяпти. Ҳамма давлат хизматчилари ўзгариши керак. Ўзгармайдиган одамларга орамизда жой йўқ», — дейди президент.
Шавкат Мирзиёев маҳаллаларда ҳоким ёрдамчилари, ёшлар ва хотин-қизлар етакчилари пайдо бўлганини алоҳида қайд этди.
«Бизнинг иш услубимиз — инсон қадри учун. Биз барча инсонларга манфаатига хизмат қиладиган ишларни қилишимиз керак. Инсонлар ишлаши учун иш жойлар яратиб берамиз. Ҳозир ‘фалончининг ўғли’, ‘фалончининг жияни’, деган гап йўқ. Барчамиз халқ хизматчисимиз. Яхши ишлаган одам ўз ўрнида кўпроқ қолади, рағбатлантирамиз. Яхши ишламаган одамни эса лавозимида олиб қолмаймиз. У халқ хизматчиси бўлмаса ишламайди», — дейди давлат раҳбари.
Ташрифини Олтиариқ туманидан бошлаган президент вилоятда икки кун — 12—13 май кунлари бўлади. Сафар давомида қишлоқ хўжалиги, тўқимачилик ва бошқа тармоқлардаги корхоналар фаолияти билан танишиш, маҳаллалардаги бунёдкорлик ишларини кўздан кечириш, вилоятни ижтимоий-иқтисодий ривожлантириш бўйича йиғилиш ўтказилиши кўзда тутилган.
Мавзуга доир:
Изоҳ (0)