Joriy yildagi g‘alla hosili uchun kutilayotgan narxlar ma’lum qilindi. Bu haqda Qishloq xo‘jaligi vazirligi xabar berdi.
O‘zbekiston Respublikasi prezidentining 2020-yil 6-martdagi “G‘alla yetishtirish, xarid qilish va sotishga bozor tamoyillarini keng joriy etish chora-tadbirlari to‘g‘risida”gi PQ-4634-sonli qarori mavjud.
Unga ko‘ra Qishloq xo‘jaligi vazirligi hamda fermer, dehqon xo‘jaliklari va tomorqa yer egalari kengashiga jahon bozori, mintaqaviy birjalar narxlarini tahlil qilgan holda kelgusi yil g‘alla hosili uchun kutilayotgan minimal narxlarni e’lon qilish vazifasi yuklatilgan.
Shuningdek, bozorlardagi narxlardan kelib chiqib, har chorakda ushbu narxga tuzatishlar kiritib, ommaviy axborot vositalarida e’lon qilib borish vazifasi ham mavjud.
Shunga muvofiq, jahon bozori hamda mintaqaviy birjalar narxlari tahlil qilinib, 1 tonna g‘alla hosili uchun kutilayotgan minimal narx 3,0 mln so‘m bo‘lishi e’lon qilindi.
Avvalroq O‘zbekistonda 1-iyundan boshlab g‘allani davlat tomonidan sotib olish va sotishda bozor narxlariga o‘tilishi haqida xabar berilgan edi.
Izoh (0)