“2022-yilda kutilayotgan suv tanqisligi sharoitida qishloq xo‘jaligi ekinlarini suv bilan ishonchli ta’minlashga qaratilgan kechiktirib bo‘lmaydigan chora-tadbirlar to‘g‘risida”gi Vazirlar Mahkamasi qarori qabul qilindi.
Qaror bilan 2022-yil yozgi sug‘orish mavsumida kutilayotgan suv tanqisligining salbiy ta’sirini yumshatish hamda mavjud suv resurslaridan samarali foydalanish tadbirlarini muvofiqlashtirish bo‘yicha respublika ishchi guruhining tarkibi tasdiqlangan.
Hujjat bilan:
- Qoraqalpog‘iston Respublikasi va viloyatlarda qishloq xo‘jaligi ekinlarini sug‘orish uchun suv olish limitlari;
- 2022-yil yozgi sug‘orish mavsumida kutilayotgan suv tanqisligining salbiy ta’sirini yumshatish va mavjud suv resurslaridan samarali foydalanish tadbirlarini muvofiqlashtirish bo‘yicha Respublika ishchi guruhi tarkibi;
- Suv xo‘jaligi vazirligi tizimidagi tashkilotlar tomonidan nasos stansiyalari va vertikal sug‘orish quduqlarini ishlatish uchun 2022-yilda sarflanadigan elektr energiyasi miqdori;
- 2022-yilda amalga oshiriladigan irrigatsiya tizimlari va ulardagi gidrotexnika inshootlarini, nasos agregatlari va sug‘orish quduqlarini ta’mirlash-tiklash va qurish ishlari rejasi tasdiqlangan.
- Suv omborlaridagi suv resurslaridan foydalanishni to‘liq nazoratga olish, ayniqsa, yirik suv omborlaridan suv chiqarish va nasos stansiyalaridan foydalanishni qat’iy ravishda Qoraqalpog‘iston Respublikasi Vazirlar kengashi raisi va viloyatlar hokimlarining aniq hisob-kitoblariga asoslangan talabnomalar bo‘yicha amalga oshirish;
- Mavjud sug‘orish va kollektor-drenaj tarmoqlarining mavsumga shayligini ta’minlash bilan bog‘liq barcha tadbirlarning bajarilishi bo‘yicha qat’iy monitoring olib borish tizimini yo‘lga qo‘yish;
- Ekin maydonlarining mavjud infratuzilmasini hisobga olgan holda, elektr energiyasi va suv bilan uzluksiz ta’minlash imkoniyatidan kelib chiqib, suvni tejaydigan sug‘orish texnologiyalarining “bir kanal — bir tizim” tamoyili asosida joylashtirilishiga e’tibor qaratish;
- Sug‘orish mavsumi davomida har o‘n kunda suv resurslaridan samarali foydalanish holatini tanqidiy o‘rganish hamda bu borada mutasaddilar va hududlar rahbarlarining hisobotlarini eshitib borish.
Avvalroq O‘zbekistonda 2050-yilga borib suv tanqisligi besh barobarga oshishi ma’lum qilingandi.
Izoh (0)