Janubiy Koreyaga ishlash maqsadida borayotgan o‘zbekistonliklarning aksariyati 14 kunlik karantin paytidagi qonunbuzilishi ortidan O‘zbekistonga qaytishga majbur bo‘layotgan edi. Endilikda shu tartib o‘zgartirildi. Bu haqda “Daryo”ga Bandlik va mehnat munosabatlari vazirligi axborot xizmati rahbari Mavjuda Mirzayeva ma’lumot berdi.
Ma’lum bo‘lishicha, 2022-yilning 10-may kuni Bandlik va mehnat munosabatlari vaziri Nozim Husanov Koreya Respublikasining O‘zbekistonda yangi tayinlangan elchisi janob Kim Xisang bilan uchrashgan.
“Vazirimiz elchi janoblari bilan muloqoti davomida o‘zbekistonliklar Janubiy Koreyaga borishni istashini, u yerda ishlash o‘zbek migrantlari uchun qulay va daromadli ekanini aytib, o‘zbekistonliklarga yengillik berish taklifini o‘rtaga tashladi. Koreya respublikasining O‘zbekistonda yangi tayinlangan elchisi janob Kim Xisang ham o‘zbekistonliklar bilan ishlash ularga ham ma’qul ekanini bildirdi. O‘zbek muhojirlari avvalroq Janubiy Koreya qonunlariga rioya etgan holda 14 kunlik karantinda bo‘lib, qonunbuzilishlarga yo‘l qo‘yardi. Endilikda karantin tartibi bekor qilindi”, — dedi Mavjuda Mirzayeva.
Mavjuda Mirzayevaning tushuntirish berishicha, vazir va elchi muloqoti o‘zbekistonlik migrantlar uchun manfaatli kelishuv bilan yakunlangan. Endilikda o‘zbekistonlik ishchilar Janubiy Koreyaga ishga borganda karantinsiz ishga kirishadigan bo‘lgan.
“Janubiy Koreyaning mamlakatimizdagi elchisi o‘zbek migrantlarining yaxshi ishlashi uchun barcha shart-sharoitni yaratib berishga tayyor ekanliklarini, ammo ular bizning yurtdoshlarimiz ham ularning qonunlarini hurmat qilgan holda, belgilangan tartibga amal qilinishidan umidvor”, — deydi vazirlik axborot xizmati rahbari.
Qo‘shimcha qilinishicha, uchrashuvda tomonlar o‘zaro aloqalarni yanada yuqori darajaga olib chiqish, migratsiya sohasida hamkorlik, KOICA tashkiloti bilan hamkorlikda Farg‘ona viloyatidagi kasb-hunarga o‘qitish markazining ochilish muddati masalalarini ham muhokama qilgan.
Izoh (0)