Endilikda O‘zbekistonda to‘lov tashkiloti, tijorat banklarining elektron to‘lov xizmatlari (shu jumladan, mobil ilovalar orqali), elektron tijorat platformalari – marketpleyslarning axborot tizimlari yordamida masofadan turib amalga oshirilgan xaridlar uchun ham keshbek to‘lanadi. Bu haqda Davlat soliq qo‘mitasi xabar berdi.
Soliq organlari axborot tizimlari bilan elektron to‘lovlar (Paynet, Oson, Payme, Click, Apelsin va boshqalar) integratsiyasining ijobiy natijalariga ko‘ra xaridlar elektron to‘lov tizimlari orqali amalga oshirilganda QR-kodli chek shakllanmoqda.
Agar iste’molchi keshbek tizimida ro‘yxatdan o‘tgan bo‘lsa, u holda marketpleyslar orqali amalga oshirilgan xarid summasining 1 foizi “Soliq” mobil ilovasida avtomatik tarzda aks etadi.
Shuningdek, keshbek olish uchun elektron chekdagi QR-kodni skanerlash imkoni ham mavjud.
Eslatib o‘tamiz, avtomobil, avia va temiryo‘l chiptalari xarid qilinganda, kommunal va aloqa xizmatlari uchun to‘lov qilinganda keshbek to‘lanmaydi.
Ma’lumot uchun, O‘zbekistonda 2022-yil 1-yanvardan xarid cheklarini “Soliq” mobil dasturi orqali ro‘yxatdan o‘tkazgan jismoniy shaxslar xarid summasidan 1 foiziga keshbekka ega bo‘lmoqda. 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR-kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
Izoh (0)