O‘zbekiston Oliy Majlisi Senati raisining birinchi o‘rinbosari Sodiq Safoyev Janubiy Koreyaning saylangan prezidenti Yun Sok Yolga O‘zbekiston prezidentining tabrigini yetkazdi, deb xabar beradi “Dunyo” agentligi.
Ma’lum qilinishicha, Sodiq Safoyev boshchiligidagi delegatsiyasining Yun Sok Yol bilan bo‘lgan muzokaralari Janubiy Koreya matbuotida keng yoritilmoqda. Xususan, mamlakatdagi yetakchi nashrlar — The Korea Herald, The Korea Times gazetalari, Yonhap axborot agentligi va qator veb-saytlarida ushbu uchrashuv haqida turkum materiallar e’lon qilingan.
Ushbu materiallarda Janubiy Koreyaning yangi saylangan prezidenti Yun Sok Yol uning inauguratsiyasida ishtirok etish uchun Janubiy Koreyaga kelgan xorijiy delegatlar bilan dushanba kuni uchrashuvlar o‘tkazgani ma’lum qilingan.
“Xususan, Yun Sok Yol Buyuk Britaniyaning Osiyo va Yaqin Sharq masalalari bo‘yicha davlat vaziri Amanda Frezing, O‘zbekiston Oliy Majlisi Senati raisining birinchi o‘rinbosari Sodiq Safoyev va Yaponiyaning sobiq bosh vaziri Yukio Xatoyama bilan alohida uchrashdi”, — deb ta’kidlagan Janubiy Koreya OAV.
Nashrlarda Yun Sok Yol O‘zbekiston delegatsiyasi rahbari Sodiq Safoyev bilan o‘tkazgan muzokaralari chog‘ida turli sohalardagi o‘zaro hamkorlikni yanada kengaytirish tarafdori ekanini ta’kidlagani qayd etilgan.
Janubiy Koreya prezidenti Seul shahrining Tongi-Dong tumanida joylashgan qarorgohida O‘zbekiston delegatsiyasini qabul qilgan. “Janubiy Koreyaning yangi prezidentiga O‘zbekiston prezidentining shaxsiy tabrigi topshirildi”, — deb yozadi manba.
Janubiy Koreya prezidenti O‘zbekiston delegatsiyasi bilan uchrashuvda o‘zaro munosabatlarni yanada chuqurlashtirish tarafdori ekanini qayd etgan. “Koreys va o‘zbek xalqlari, ikki mamlakat ishbilarmonlari o‘rtasidagi aloqalarni yanada mustahkamlashni, Janubiy Koreya kompaniyalari O‘zbekistonga ko‘proq sarmoya kiritishini qo‘llab-quvvatlaymiz. Bu yil mamlakatlarimiz o‘rtasida diplomatik munosabatlar o‘rnatilganining 30 yilligi nishonlanmoqda. O‘zbekistonda yashovchi 200 mingga yaqin koreyslar mamlakat hayotining siyosiy, biznes, madaniy va boshqa sohalarida faol ishtirok etib, ikki mamlakat o‘rtasidagi mustahkam ko‘prik bo‘lib xizmat qilmoqda”, — deya prezident so‘zlaridan iqtibos keltirgan elektron nashr.
Maqolada qayd etilishicha, Sodiq Safoyev O‘zbekiston Janubiy Koreya nomzodini BMT Xavfsizlik kengashining doimiy bo‘lmagan a’zoligiga surilishini qo‘llab-quvvatlashini ma’lum qilgan. “O‘zbekiston prezidenti Janubiy Koreya va O‘zbekiston o‘rtasidagi alohida do‘stlik munosabatlarini doimo qo‘llab-quvvatlaydi. So‘nggi besh yilda O‘zbekiston bilan Janubiy Koreya o‘rtasidagi hamkorlik aloqalari kengaydi va chuqurlashdi. Ular ikki baravarga oshdi”, — deya O‘zbekiston delegatsiyasi rahbari so‘zlaridan iqtibos keltirilgan maqolada.
Eslatib o‘tamiz, Janubiy Koreyada prezidentlik saylovlari 9-mart kuni bo‘lib o‘tgandi, unda ro‘yxatga olingan saylovchilarning 77,1 foizi ishtirok etgan, ya’ni 44 million saylovchilarning 34 millioni qatnashgan. Prezidentlik uchun asosiy nomzodlar mamlakatdagi hukmron Birlashgan demokratik partiya vakili Li Chje Myon va uning asosiy raqibi “Fuqarolik kuchi” muxolifat konservativ partiyasi nomzodi Yun Sok Yol edi. Uchinchi ommalashgan nomzod markaziy “Xalq partiyasi” vakili An Chxol Su saylovlardan avval Yun Sok Yol nomzodini qo‘llab-quvvatlashini ma’lum qilgan. 10-mart kuni e’lon qilingan natijalarga ko‘ra, Janubiy Koreyadagi prezidentlik saylovlarida muxolifatchi Yun Sok Yol g‘alaba qozongan.
Izoh (0)