Toshkent shahrida 11—12-may kunlari “Xalq diplomatiyasi — taraqqiyot yo‘lida o‘zaro hamjihatlik” shiori ostida Shanxay hamkorlik tashkilotiga a’zo davlatlarning Xalq diplomatiyasi forumi bo‘lib o‘tadi. Bu haqda Tashqi ishlar vazirligi rasmiy vakili xabar qildi.
Qayd etilishicha, tadbir O‘zbekistonning SHHTga raisligi tashabbusida o‘tkaziladi. Forumda tashkilotga a’zo davlatlar parlamentlari, xalqaro tuzilmalar, nodavlat notijorat tashkilotlari, shuningdek, ilmiy-tahlil markazlari vakillaridan iborat 120 dan ortiq ishtirokchi qatnashishi kutilmoqda.
Forum avvalida ishtirokchilarga tabrik nutqlari bilan Senat raisi Tanzila Norboyeva, Butunxitoy xalq vakillari kengashi Doimiy qo‘mitasi raisi o‘rinbosari, SHHTning yaxshi qo‘shnichilik, do‘stlik va hamkorlik bo‘yicha Xitoy qo‘mitasi raisi Shen Yueyuye va O‘zbekiston tashqi ishlar vaziri vazifasini bajaruvchi Vladimir Norov so‘zga chiqadi.
Forum yakunlari bo‘yicha SHHT xalq diplomatiyasining Toshkent kommyunikesini qabul qilish rejalashtirilgan.
Avvalroq Toshkentda ShHTga a’zo davlatlar vakillari Eronning tashkilotga kirish tartibini kelishib olgani, O‘zbekiston 2022-yil qanday xalqaro tadbirlarga mezbonlik qilishi, Toshkentda ShHT xalqaro yarim marafoni bo‘lib o‘tgani haqida xabar berilgan.
Izoh (0)