Жанубий Кореяга ишлаш мақсадида бораётган ўзбекистонликларнинг аксарияти 14 кунлик карантин пайтидаги қонунбузилиши ортидан Ўзбекистонга қайтишга мажбур бўлмоқда. Бу ҳақда «Дарё»га Бандлик ва меҳнат муносабатлари вазирлиги ахборот хизмати раҳбари Мавжуда Мирзаева маълумот берди.
Маълум бўлишича, 2022 йилнинг 10 май куни Бандлик ва меҳнат муносабатлари вазири Нозим Ҳусанов Корея Республикасининг Ўзбекистонда янги тайинланган элчиси жаноб Ким Хисанг билан учрашган.
«Вазиримиз элчи жаноблари билан мулоқоти давомида ўзбекистонликлар Жанубий Кореяга боришни исташини, у ерда ишлаш ўзбек мигрантлари учун қулай ва даромадли эканини айтиб, ўзбекистонликларга енгиллик бериш таклифини ўртага ташлади. Корея республикасининг Ўзбекистонда янги тайинланган элчиси жаноб Ким Хисанг ҳам ўзбекистонликлар билан ишлаш уларга ҳам маъқул эканини билдирди. Аммо ўзбек муҳожирлари ҳам Жанубий Корея қонунларига риоя этган ҳолда 14 кунлик карантин пайтида қонунбузилишларга йўл қўймаслиги кераклигини, бу эса ҳам иш берувчига ҳам ўзбек муҳожирлари учун манфаатли бўлишини таъкидлади», — деди Мавжуда Мирзаева.
Мавжуда Мирзаеванинг тушунтириш беришича, вазир ва элчи мулоқоти ўзбекистонлик мигрантлар учун манфаатли келишув билан якунланган. Эндиликда ўзбекистонлик ишчилар Жанубий Кореяга ишга борганда карантинсиз ишга киришадиган бўлган.
«Жанубий Кореянинг мамлакатимиздаги элчиси ўзбек мигрантларининг яхши ишлаши учун барча шарт-шароитни яратиб беришга тайёр эканликларини, аммо улар бизнинг юртдошларимиз ҳам уларнинг қонунларини ҳурмат қилган ҳолда, белгиланган тартибга амал қилинишидан умидвор», — дейди вазирлик ахборот хизмати раҳбари.
Қўшимча қилинишича, учрашувда томонлар ўзаро алоқаларни янада юқори даражага олиб чиқиш, миграция соҳасида ҳамкорлик, КОИCА ташкилоти билан ҳамкорликда Фарғона вилоятидаги касб-ҳунарга ўқитиш марказининг очилиш муддати масалаларини ҳам муҳокама қилган.
Изоҳ (0)