O‘zbekistonda dastlabki 3 oyda 37 ta fotoradar va kuzatuv kamerasi ishga tushirildi

Korrupsiyaga qarshi kurashish agentligi 2022-yilda o‘rnatilgan fotoradar hamda intellektual kuzatuv kameralari to‘g‘risidagi ma’lumotlarni tahlil qildi. Bu haqda agentlik axborot xizmati xabar qildi.

Qayd etilishicha, prezidentning tegishli farmoni bilan ochiq ma’lumotlar sifatida joylashtirilishi kerak bo‘lgan 33 turdagi ijtimoiy ahamiyatga molik ma’lumotlar ro‘yxati tasdiqlangan. Ular orasida Ichki ishlar vazirligi Jamoat xavfsizligi departamenti Yo‘l harakati xavfsizligi xizmati tomonidan maxsus avtomatlashtirilgan foto va video qayd etish dasturiy-texnik vositalari o‘rnatilgan aniq manzillar hamda ular tomonidan qayd etiladigan yo‘l harakati qoidabuzarligining turi haqidagi ma’lumotlarni fuqarolar uchun ochiq e’lon qilib borish tartibi belgilangan.

Korrupsiyaga qarshi kurashish agentligi tomonidan mazkur ma’lumotlarning ochiqlanish holati bo‘yicha muntazam monitoring olib borilmoqda.

Ma’lum bo‘lishicha, respublika hududidagi avtomobil yo‘llarida 2022-yil birinchi choragida jami 37 ta yangi fotoradar hamda kuzatuv kameralari ishga tushirilgan. Ulardan 4 tasi xavfsizlik kamarini taqmaslik yoki haydovchilarning telefondan foydalanganlik holatini aniqlovchi kuzatuv kamerasi, 33 tasi esa harakat tezligini belgilangan me’yordan oshirib yuborganlik holatini aniqlovchi fotoradar qurilmalari hisoblanadi.

Yangi ishga tushirilgan fotoradar hamda kuzatuv kameralari hududlar kesimida quyidagicha:

• Surxondaryo viloyatida – 10 ta;
• Xorazm viloyatida – 7 ta;
• Qashqadaryo viloyatida – 5 ta;
• Toshkent shaharida – 5 ta;
• Farg‘ona viloyatida – 4 ta;
• Toshkent viloyatida – 4 ta;
• Buxoro viloyatida – 2 ta.

Avvalroq Buxoroda maxsus radar moslamasi bilan jihozlangan avtomobillar faoliyat ko‘rsata boshlagani, O‘zbekistonda YPX xodimi tasvirini uning ruxsatisiz tarqatish taqiqlanishi mumkinligi, Toshkentda maktab va bog‘chalar atrofida tezlikni 30 kmdan oshirgan haydovchilar orasida tushuntirish ishlari olib borilayotgani xabar qilingandi.