Samarqand viloyati Kattaqo‘rg‘on tumanida eski tomchilatib sug‘orish uskunalarini o‘rnatib, kredit mablag‘ini o‘zlashtirgan fermer xo‘jaligi rahbari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Kattaqo‘rg‘on tuman bo‘limi tomonidan tergovga qadar tekshiruv o‘tkazilgan. Tekshiruv davomida “M.B.” fermer xo‘jaligi rahbari A.X. tumandagi “Yangihayot” massividagi 40 gektar paxta yer maydoniga tomchilatib sug‘orish texnologiyalarini olib kelib o‘rnatish uchun bank muassasasidan 700 million so‘m kredit ajratilishiga erishgani aniqlangan. U kredit mablag‘ini o‘zlashtirish maqsadida yer maydonining 26 gektariga eski va sifatsiz uskunalarni o‘rnatib, keyinchalik uskunalarni yana qaytarib olib ketib, kredit mablag‘ini maqsadsiz ishlatgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Xorazmda issiqxona qurish uchun bankdan 2 mln dollar kredit ajratib berish evaziga 80 ming dollar olgan shaxslar ushlangani to‘g‘risida xabar berilgandi.
Mavzuga doir:
- Sirdaryoda o‘zgalar nomiga 1,2 mlrd so‘m kredit rasmiylashtirgan sobiq bank xodimlariga jinoyat ishi ochildi
- Toshkent viloyatida 2,4 gektar yerni qariyb 1 mln dollarga sotmoqchi bo‘lgan shaxslar qo‘lga tushdi
- Qibrayda qishloq xo‘jaligi yerlarida qurilish ishlarini amalga oshirib, 1,8 mlrd so‘m zarar yetkazgan shaxslar aniqlandi
Izoh (0)