Toshkent shahri Yunusobod tumanida Tracker mashinasi haydovchisi Cobalt va YPX inspektorini urib yuborib, ag‘darilgani haqida xabar berilgandi. Toshkent shahar sudlari haydovchiga nisbatan sud hukmini e’lon qildi.
Qayd etilishicha, voqea 2021-yilning 23-sentabr kuni soat 07:30 larda Yunusobod tumani Amir Temur ko‘chasida sodir bo‘lgan. Toshkent shahar IIBB YHXB inspektori kichik serjant Anvar Otaboyev xizmat vazifasini o‘tash jarayonida SH.U. (49 yoshli) boshqaruvidagi Cobalt avtomashinasini hushtak va jezl orqali to‘xtatgan. Shu vaqt uning orqasidan harakatlanib kelayotgan K.U. (1989-yilda tug‘ilgan, “Innovatsiya, texnologiya va strategiya markazi” DUK haydovchisi) boshqaruvidagi Tracker Cobalt bilan to‘qnashib ketgan va xizmat olib borayotgan YHXB inspektorini urib yuborib, ag‘darilib, daraxtga urilgan.
YTH oqibatida xodim tan jarohatlari olib kasalxonaga yotqizilgan. Shuningdek, Tracker Primier avtoulovida K.U.ning yo‘lovchi tariqasida o‘tirgan turmush o‘rtog‘i ham tan jarohatlar olib, shifoxonaga olib borilgan.
Sud hukmi
Holat yuzasidan Tracker haydovchisiga nisbatan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilgan. 7-aprel kuni o‘qilgan sud hukmiga ko‘ra, u yuqorida keltirilgan modda bo‘yicha aybdor deb topilib, unga ish haqining 15 foizi miqdorini davlat daromadi hisobiga ushlab qolgan holda 2 yil muddatga axloq tuzatish ishlari jazosi tayinlangan.
Xalq ta’limi vazirligi qoshidagi “Innovatsiya, texnologiya va strategiya markazi” DUK hisobidan fuqaroviy da’vogar Sh.U. foydasiga 15 469 100 so‘m, jabrlanuvchi A.A. foydasiga jami 4 060 002 so‘m yetkazilgan moddiy zarar undirilishi belgilangan.
25-aprel kuni sudlanuvchi tomonidan chiqarilgan hukm ustidan apellyatsiya tartibida shikoyat berilib, ayni paytda ushbu shikoyat Toshkent shahar sudining jinoyat ishlari bo‘yicha sudlov hay’ati apellyatsiya instansiyasida ko‘rish uchun rasmiylashtirilmoqda. Apellyatsiya shikoyatini ko‘rib chiqish yakuni bo‘yicha qo‘shimcha axborot beriladi.
Avvalroq Navoiyda 25 nafar yo‘lovchi bo‘lgan avtobus ag‘darilib ketgani, Andijonda Nexia-3 bilan to‘qnashgan Tico ikkiga bo‘linib ketgani, Farg‘onada Tracker va Gentra to‘qnashuvi oqibatida yo‘lovchi halok bo‘lgani xabar qilingandi.
Izoh (0)