2022-yilning aprel oyida ham so‘mning real samarali almashuv kursi mart oyiga nisbatan qariyb 1,4 foizga qadrsizlandi. Bu haqda Markaziy bank sharhidan ma’lum bo‘ldi.
Aprel oyida real samarali almashuv kursining qadrsizlanishiga asosan savdo-hamkor davlatlardagi yuqori inflyatsiya darajasi hamda valyuta kurslaridagi turli yo‘nalishdagi o‘zgarishlar bilan izohlanadi, — deydi Markaziy bank
Aprel oyidagi real samarali almashuv kursi indeksi dinamikasida:
- oshiruvchi omillar: ichki inflyatsiya – 1,5 foiz band;
- pasaytiruvchi omil: savdo-hamkor davlatlar inflyatsiyasi – 1,7 foiz bandni, savdo-hamkor davlatlar valyuta kurslari o‘zgarishi – 0,2 foiz band hamda so‘m almashuv kursi – 0,9 foiz bandni tashkil etdi.
2022-yil birinchi choragida Rossiya savdo balansi 66,3 mlrd AQSH dollar profitsit bilan ijro etildi. Shuningdek, 29-aprel kuni Rossiya Markaziy banki asosiy foiz stavkasini 17 foizdan 14 foizgacha pasaytirdi.
Qozog‘iston tengesi ham aprel oyida 3,8 foizga (470,9 dan 452,9 ga) mustahkamlandi. Qozog‘iston Markaziy banki 25-aprelda asosiy foiz stavkasini 13,5 foizdan 14 foizgacha oshirdi.
Turk lirasi esa mazkur oy davomida biroz (0,2 foizga) qadrsizlandi.
Aprel oyida Xitoyda kuzatilgan pandemiyaning yangi to‘lqini fonida yuan 1,2 foizga qadrsizlandi.
2022-yil aprel oyida asosiy savdo-hamkor davlatlarning deyarli barchasida inflyatsiya ko‘rsatkichi o‘sishda davom etdi, — deyiladi Markaziy bank sharhida.Rossiyada oylik inflyatsiya mart oyiga nisbatan biroz sekinlashib, 1,6 foizni (yillik hisobda 18 foizni) tashkil etishi kutilmoqda.
Shuningdek, import qilinadigan avtomobillar, maishiy kimyo vositalari hamda dori-darmonlar narxi o‘sishi sekinlashgan.
Qozog‘istonda oylik inflyatsiya 2 foizni tashkil etib, yillik hisobda 13,2 foizga yetdi. Bunda oziq-ovqat mahsulotlari oylik 3,1 foizga (yillik 17,9 foizga) o‘sdi.
Turkiyada oylik inflyatsiya 7,3 foizga yuqorilab, yillik hisobda 70 foizgacha o‘sdi. Narxlar o‘sishiga asosan oziq-ovqat hamda yoqilg‘i mahsulotlari katta hissa qo‘shgan. Mamlakatda ishlab chiqaruvchilar narxlari indeksi oylik hisobda 7,7 foizga o‘sib, yillik 121,8 foizga yetdi.
Izoh (0)