Termiz tumani “Do‘stlik” mahallasida yashovchi Ulkan Eraliyev bog‘ni sug‘orish chog‘ida yerdan sariq metall parchasini topib, Termiz arxeologiya muzeyiga murojaat qildi, deb xabar beradi Turizm va madaniy meros vazirligi.
Ma’lum qilinishicha, muzey va viloyat madaniy meros boshqarmasi xodimlaridan iborat guruh topilma aniqlangan joyga borib, qazilma maydonini dastlabki ish jarayonini olib borgan. Qoraxoniylar va Saljuqiylar davriga oid kulolchilik buyumlari parchalari topilgan.
Ulkan Eraliyev qimmatbaho topilmani belgilangan tartibda Termiz arxeologiya muzeyiga topshirgan, shundan so‘ng unga amaldagi qoidalarda belgilangan haq to‘lab berilgan.
Muzey direktori boshchiligidagi muzey mutaxassislari va numizmatlari tomonidan qimmatbaho topilma dastlabki ekspertizadan o‘tkazilgan.
“Oltin dinorning old tomonida muzey numizmati doktoranti Mansur Normo‘minov “Alloh” va “Muhammad” so‘zlarini, shuningdek, arab alifbosining ayrim harflarini o‘qishga muvaffaq bo‘lgan. Tanganing orqa tomonidagi matn deyarli o‘chib ketgan. Shikastlangan, lekin yaxshi saqlanib qolgan tanga — oltin dinorning og‘irligi 1,92 grammni tashkil qiladi.
Ma’lumot uchun, Termiz o‘zining strategik joylashuvi tufayli imperiyalar o‘rtasida tez-tez tortishuvlar va urushlar obyektiga aylangan. X asrning 2-yarmida shahar Qoraxoniylar va G‘aznaviylar o‘rtasidagi qonli to‘qnashuvlar joyi bo‘lgan. Bu hukmdorlar bir-birlari bilan bo‘lgan urushda allaqachon qattiq holdan toyganidan foydalangan Saljuqiy shahzodalar To‘g‘rulbek va Chag‘rilbek Termiz va uning atrofini egallab olgan.
Ta’kidlanishicha, bu yil Termiz arxeologiya muzeyi ochilganiga 20 yil to‘ldi va o‘tgan shuncha vaqt davomida ushbu muzeyda birorta ham tilla tanga bo‘lmagan.
Avvalroq Surxondaryodan topilgan mis tangalar Mirzo Ulug‘bek davriga tegishli ekani tasdiqlangandi.
Izoh (0)