Toshkent viloyatining Bektemir tumanida tibbiyot xodimini yuqori lavozimga tayinlashga yordam berish uchun pul talab qilgan shaxslar ushlandi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Bektemir tumani bo‘limlari tomonidan tezkor tadbir o‘tkazilgan. Tadbir davomida M.D. va S.X. ismli shaxslar fuqaro X.ni (mutaxassisligi shifokor) yuqori lavozimda ishlovchi tanishlari orqali Nurafshon shahardagi Tez tibbiy yordam bo‘limiga ishga kiritib, keyinchalik go‘yoki bosh shifokor o‘rinbosari lavozimiga tayinlatib berish evaziga 1,3 ming dollar olgan vaqtida ashyoviy dalillar bilan ushlangan.
Shuningdek, Xovos tuman bo‘limi tomonidan o‘tkazilgan tezkor tadbirda U.A. ismli shaxs fuqaro I.ning ishonchiga kirib, uni Xovos vagon ta’mir korxonasida ishlovchi tanishlari orqali ishga kiritib qo‘yish evaziga 1,5 ming dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Sirdaryo viloyati perinatal markazi xodimasi ishga joylashtirish evaziga pora olayotganida qo‘lga tushgani, Sirdaryoda tez yordamga dispetcherlikka ishga kiritib qo‘yish uchun 700 dollar so‘ragan shifokor ushlangani to‘g‘risida xabar berilgandi.
Mavzuga doir:
- Samarqandda ishga kiritib qo‘yish uchun 500 dollar olgan tez yordam bo‘limi mudiri ushlandi
- Navoiyda oliy toifali sud tibbiy eksperti 1,5 mln so‘m pora bilan qo‘lga tushdi
- Namanganda ayol 18 nafar fuqaroni shifoxonaga ishga joylash uchun 300 va 500 dollardan olgani aniqlandi
- Samarqandda fuqaroni hamshiralikka ishga joylashtirish uchun 400 dollar va 1 mln so‘m olgan feldsher ushlandi
Izoh (0)