Ijtimoiy tarmoqlarda Samarqand viloyatining ba’zi tumanlariga kuchli sel kelgani tasvirlangan video tarqaldi. Samarqand viloyati FVB holat yuzasidan ma’lumot berdi.
Ma’lum qilinishicha, 9-may kunidan 10-may kuniga o‘tar kechasi Samarqand tumani “Yuqori Ohalik” MFYda qisqa muddatli ko‘p miqdorda yomg‘ir yog‘ishi natijasida ushbu hududdan oqib o‘tuvchi soyga yomg‘ir suvlari sig‘may, toshib chiqish holati yuzaga kelgan.
Hodisa oqibatida taxminan soat 23:30 larda ushbu mahallada yashovchi fuqaro M.A. ga tegishli bo‘lgan “VAZ-21011” rusumli avtomobil yashash uyi yaqinidagi soy suv yo‘lida qolgani sababli kelayotgan yomg‘ir suvlari uni taxminan 40-50 metr masofaga surib borgan, natijada avtomobilga qisman zarar yetgan.
Hodisa oqibatida tan jarohati olgan va halok bo‘lganlar yo‘q. Mazkur holat yuzasidan tuman FVBga fuqarolar tomonidan murojaatlar kelib tushmagan.
Eslatib o‘tamiz, Volgabo‘yi hududlaridan nam va nisbatan salqin havo massalari kirib kelib, kuchli yog‘ingarchilik kuzatilgani sabab O‘zbekistonning ayrim hududlari, xususan, Jizzax, Sirdaryo, Surxondaryo viloyatlarida sel oqimlari va toshqinlar yuzaga keldi. Poytaxt ko‘chalarini ham suv bosdi.
Izoh (0)