Farg‘onaning Uchko‘prik tumani hokimi Akmaljon Mahmudaliyev Navoiy viloyati hokimiga o‘rinbosar bo‘ldi. Bu haqda “Daryo” muxbiri Azizjon Ermatov xabar berdi.
Qayd etilishicha, Akmaljon Azimjonovich Mahmudaliyev farg‘onaliklarga Navoiy viloyati hokimining qishloq va suv xo‘jaligi masalalari bo‘yicha o‘rinbosari sifatida tanishtirilgan.
Akmaljon Mahmudaliyev 1974-yil Farg‘ona viloyatida tug‘ilgan bo‘lib, 1995-yilda Samarqand kooperativ institutining buxgalteriya hisoboti fakultetini, 2005-yilda Toshkent Kimyo-texnologiya institutining don va don mahsulotlarini qayta ishlash texnologiyasi fakultetini tamomlagan.
2007-yildan 2013-yilgacha Davlat don inspeksiyasining Farg‘ona viloyati hududiy bo‘linmasida yetakchi va bosh davlat don inspektori lavozimlarida ishlagan. 2013-yilning sentabr oyidan Vazirlar Mahkamasi huzuridagi Davlat don inspeksiyasi boshlig‘ining o‘rinbosari lavozimida faoliyat yuritgan.
U 2018-yilning 14-iyun kunidan boshlab tayinlovga qadar Farg‘ona viloyatining Uchko‘prik tumaniga hokimlik qilib kelayotgan edi.
Izoh (0)