Россия босқини тугаганидан кейин Украина иқтисодиёти ва инфратузилмасини тиклаш учун ўртача 600 миллиард доллар керак бўлади, деди мамлакат президенти Владимир Зеленский The Wall Street Journal томонидан ташкил этилган ижрочи директорлар саммитида.
«Ишончим комилки, ғалабадан кейин биз ҳаммасини тезда амалга оширамиз, Украина аввалгидан ҳам гўзалроқ бўлади», — деди Зеленский.
Бундан ташқари, Зеленский хорижий компанияларни жалб қиладиган сармоявий муҳит яратишга ваъда берди. «Сиз бизнинг мамлакатимизга, 40 миллиондан ортиқ бозоримизга киришингиз мумкин бўлади», — деди Украина президенти.
600 миллард долларлик сумма ҳақида биринчи бўлиб Украина бош вазири Денис Шмигал гапирган. Унинг таъкидлашича, бу маблағ узоқ муддатда иқтисодиёт ва инфратузилмани тиклаш учун зарур бўлади.
Аввалроқ Украина расмийлари Россия банкининг санкциялар сабаб музлатиб қўйилган хорижий маблағлари мамлакатни тиклаш учун ишлатилиши мумкинлигини бир неча бор таъкидлаган эди. Украина Иқтисодиёт вазирлиги уларнинг ҳажмини 415 миллиард долларга баҳолаган ва Ғарбдаги ҳамкорларидан бу пулларни Киев фойдасига мусодара қилиш механизмини ишлаб чиқишни сўраган. Россия молия вазири Антон Силуановга кўра, Ғарб Россия Марказий банкининг хориждаги 640 миллиард долларлик заҳираларидан 300 миллиардга яқинини музлатиб қўйган.
Шмигалнинг сўзларига кўра, ҳозир Киевга ойига 4 миллиард доллардан 5 миллиард долларгача маблағ зарур, Киев Жаҳон банки, ХВФ ва G20 билан музокаралар олиб бормоқда. Гап, биринчи навбатда, Украинадаги ички кўчирилганларга инсонпарварлик ёрдами ҳақида кетмоқда, уларнинг сони 7 миллионга яқин, деди Украина бош вазири. Зеленскийнинг ўзи мамлакатга ойига 7 миллиард доллар керак бўлишини айтган. Унинг сўзларига кўра, бу маблағ нафақат мамлакатни тиклаш, балки иш ҳақини тўлаш ва фуқаролар олдидаги ижтимоий мажбуриятларни бажариш учун ҳам зарур.
Шу билан бирга Жаҳон банки Россия босқини оқибатида Украинага етказилган зарарни 60 миллиард долларга баҳолаган эди. Банк президенти Дэвид Малпасснинг таъкидлашича, бу иқтисодий харажатларни ўз ичига олмайдиган дастлабки ҳисоб, у инфратузилма ва биноларнинг вайрон бўлиши натижасида етказилган зарарни назарда тутади. Жанглар давом этар экан, қурбонлар ортади, дея қўшимча қилган у.
Изоҳ (0)