Сирдарёда ер майдонини фуқарога уй-жой хонадонларини қуриш учун сотаётган шахс қўлга олинди. Бу ҳақда «Ёшлар» телеканалининг «Янги даври» информацион дастурида маълум қилинди.
Маълум қилинишича, Бош прокуратура ҳузуридаги департаментнинг Сирдарё вилояти бошқармаси Боёвут туман бўлими ҳамда ДХХнинг Сирдарё вилояти бошқармаси ходимлари томонидан тезкор тадбир ўтказилган. Тадбир давомида фуқарога Гулистон шаҳар ҳокимининг қарорига кўра «Янгибозор» ҳудудида жойлашган хусусий болалар боғчаси ва ўқув маркази қуриш учун мўлжалланган ер майдонини уй-жой хонадонлари қуриш учун ажратиб беришни ваъда қилган шахс аниқланган. У ушбу ер майдонини кадастр бўлинмасида ишловчи танишлари орқали ҳужжатларни расмийлаштириш ҳамда нотариал идора орқали фуқаро номига ўтказиб бериш эвазига 60 минг доллар сўраган.
Мазкур шахс Гулистон шаҳри ҳудудида жойлашган вилоят тиббиёт бирлашмаси олдида келишилган пулнинг 8 минг долларини олган вақтида ушланган. Ҳолат юзасидан Жиноят кодексининг тегишли моддалари бўйича жиноят иши қўзғатилган.
Аввалроқ Самарқандда туман ҳокимининг сохта қарори билан қарийб 20 минг долларга ер сотган хўжалик раҳбари аниқлангани, Навоийда ноқонуний уй-жой қуриш билан шуғулланган жиноий гуруҳ аъзолари қўлга олингани тўғрисида хабар берилганди.
Мавзуга доир:
- Ўзбекистоннинг 3 та ҳудудида фуқароларга ер майдонлари олиб бериш учун пул талаб қилган шахслар ушланди
- Тошкент вилоятида 2 гектар суғориладиган ерни 500 минг долларга расмийлаштириб беришни ваъда қилган жамият раҳбари ушланди
- Наманганда кам таъминланган оилаларга ажратилган 1 гектар ерни 80 млн сўмга сотмоқчи бўлган шахс ушланди
Изоҳ (0)