Россия кучларининг Украинадаги ҳаракатлари ўта оғир оқибатларга олиб келиши, жангларни тўхтатиш зарур дея таъкидлаган Франция президенти Эммануэль Макрон россиялик ҳамкасби Владимир Путин билан телефон суҳбатида. Бу ҳақда Елисей саройи хабар қилган.
«Макрон Мариупол ҳамда Донбассдаги вазиятдан хавотирда эканлигини айтди ва Россиядан сўнгги кунларда «Азовсталь» заводидаги одамларни эвакуация қилиш ишларини давом эттиришга рухсат беришни сўради», — дейилади хабарда.
Париж ваколатли халқаро ташкилотлар билан ҳамкорликда Россиянинг Украина озиқ-овқат маҳсулотларини Қора денгиз орқали экспорт қилинишига нисбатан тақиқини олиб ташлашга ҳаракат қилади, Франция мазкур блоклаш бутун дунёда озиқ-овқат иқирозини юзага келтириши мумкинлигидан хавотирда.
Путин ва Макроннинг суҳбати икки соат ўн дақиқа давом этган, дея хабар берган BFM журналисти Патрик Сос.
Март охирида Макрон дунё миқёсида озиқ-овқат инқирози бўлишининг эҳтимоли юқори эканлиги ҳақида огоҳлантирган, АҚШ президенти Жо Байден унинг ушбу тахминига қўшилишини айтганди. Франция президентининг сўзларига кўра Украинадаги ҳарбий ҳаракатлар сабаб буғдой импорт қиладиган давлатлар 1 – 1,5 йил ичида оғир қийинчиликларда дуч келиши мумкин. Май бошида Германия канцлери Олаф Шолц дон харид қила олмайдиган мамлакатлардаги очарчилик муаммосини ҳал этишга ёрдам беришини билдирган.
Украинадан дон етказиб берилмаётгани юзасидан Бутунжаҳон савдо ташкилоти ҳам хавотирда.
«Келгуси йилларда озиқ-овқат маҳсулотлари нархининг ўзгариши ва очарчилик муаммоси жиддий бўлади. Озиқ-овқат ва энергия — бутун дунёдаги қашшоқлар истеъмол саватидаги энг катта икки предмет ҳисобланади», — дея қайд этган БСТ бош директори Нгози Оконжо-Ивеала.
БМТ май бошида Украина портида тахминан 4,5 млн тонна дон йиғилиб қолгани ва уни олиб чиқиб кетишнинг имкони бўлмаётганини маълум қилган.
Изоҳ (0)