Буюк Британия Украинага 375 миллион доллар (300 миллион фунт стерлинг) миқдоридаги навбатдаги ҳарбий ёрдамни юборади, деб хабар бермоқда Reuters Британия бош вазири Борис Жонсон девонига таяниб.
Пакет радиоэлектрон курашиш ускуналари, тунги кўриш мосламалари, сунъий йўлдош навигациясини блоклаш воситалари, оғир дронлар ва антибатарея радиолокацион тизимини ўз ичига олади.
Бундан ташқари, Буюк Британия фуқаролик амалдорлари хавфсизлигини таъминлаш ва тинч аҳолини эвакуация қилиш учун ўндан ортиқ янги махсус Toyota Landcruiser автомобилларини юборади.
Дастлабки маълумотларга кўра, Жонсон Киевга янги ҳарбий ёрдамнинг юборилиши ҳақида 3 май куни Украина парламенти олдида видеоалоқа шаклидаги чиқиши чоғида эълон қилмоқчи.
Россия 24 февралдан бери Украинада «ҳарбий махсус операция» ўтказмоқда. Ғарб давлатлари, жумладан, АҚШ ва Буюк Британия Киевга қурол етказиб беришни бошлаган. Апрель ойи бошида Жонсон Британия Украинага Старстреак кўп мақсадли ракеталари, 120 та зирҳли транспорт воситалари ва кемага қарши тизимларни ўз ичига олган 100 миллион фунт стерлинглик қурол-яроғлар берилишини эълон қилганди. Бош вазир қурол етказиб беришни Украинадаги воқеаларга жаҳон ҳамжамиятининг энг яхши жавоби деб атаган.
Изоҳ (0)