Surxondaryo viloyati Sariosiyo tumanida fermer xo‘jaligi yer maydonini o‘zboshimchalik bilan egallab olish holati aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Sariosiyo tuman bo‘limi tomonidan “O.F.” fermer xo‘jaligining murojaatiga asosan tergovga qadar tekshiruv o‘tkazilgan. Tekshiruv davomida fuqaro O.I. ushbu xo‘jalikning paxta va g‘allaga mo‘ljallangan 47-ball bonitetli sug‘oriladigan yer maydonining 6 sotixini egallab olib, o‘zboshimchalik bilan uy-joy qurish uchun beton poydevorlarni quyib, qurilish ishlarini amalga oshirib kelayotgani aniqlangan.
Mazkur holat yuzasidan Jinoyat kodeksining 229-1-moddasi (yer uchastkalarini o‘zboshimchalik bilan egallab olish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda 22 ming dollarga yer sotishga uringan ota-o‘g‘ilning qilmishi fosh bo‘lgani, Toshkent viloyatida 2 gektar sug‘oriladigan yerni 500 ming dollarga rasmiylashtirib berishni va’da qilgan jamiyat rahbari ushlangani to‘g‘risida xabar berilgandi.
Izoh (0)