Сурхондарё вилояти Сариосиё туманида фермер хўжалиги ер майдонини ўзбошимчалик билан эгаллаб олиш ҳолати аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Сариосиё туман бўлими томонидан «О.Ф.» фермер хўжалигининг мурожаатига асосан терговга қадар текширув ўтказилган. Текширув давомида фуқаро О.И. ушбу хўжаликнинг пахта ва ғаллага мўлжалланган 47-балл бонитетли суғориладиган ер майдонининг 6 сотихини эгаллаб олиб, ўзбошимчалик билан уй-жой қуриш учун бетон пойдеворларни қуйиб, қурилиш ишларини амалга ошириб келаётгани аниқланган.
Мазкур ҳолат юзасидан Жиноят кодексининг 229-1-моддаси (ер участкаларини ўзбошимчалик билан эгаллаб олиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқандда 22 минг долларга ер сотишга уринган ота-ўғилнинг қилмиши фош бўлгани, Тошкент вилоятида 2 гектар суғориладиган ерни 500 минг долларга расмийлаштириб беришни ваъда қилган жамият раҳбари ушлангани тўғрисида хабар берилганди.
Изоҳ (0)