SSV Kinder shokoladlaridan salmonellyoz kasalligiga chalinish holatlari qayd etilayotgani haqidagi xabarlarga munosabat bildirdi

Dunyoning ayrim mamlakatlarida salmonellyoz infeksiyasiga sabab bo‘layotgan Kinder savdo belgisi ostida Belgiyada ishlab chiqarilgan shokolad mahsulotlari sotuv rastalaridan olib tashlanmoqda. Sog‘liqni saqlash vazirligi holatga munosabat bildirib, O‘zbekistondagi kasallik bilan bog‘liq vaziyat haqida ma’lumot berdi.

Jahon sog‘liqni saqlash tashkilotining ma’lum qilishicha, hozirgacha dunyoning 11 davlatida salmonellyoz kasalligiga chalinish holatlari keskin oshib ketishi ayni shu shirinliklar bilan bog‘liq. Zararlangan shokolad mahsulotlari kamida 113 mamlakatga tarqatilgani aytilmoqda. Ayni paytga qadar salmonellyoz bilan bog‘liq 151 holatdan 150 tasi Yevropada ro‘yxatga olingan bo‘lsa, qolgan biri AQSHda kuzatilgan. Shu sababli ana shu va boshqa hududlarda Kinder Surprise, Kinder Mini Eggs, Kinder Surprise Maxi va Kinder Schoko-Bons nomli mahsulotlar do‘konlardan qaytarib olinmoqda.

Mutaxassislar izohiga ko‘ra, salmonellyoz insonning oshqozon-ichak traktiga zarar yetkazuvchi bakteriyalardir. Ushbu infeksiya ko‘p hollarda bemorlarda yengil alomatlar bilan kechsa, ba’zi turlari odamlarda o‘tkir kasalliklarni keltirib chiqarishi mumkin. Umumiy simptomlar orasida diareya, isitma, qorin og‘rig‘i va ko‘ngil aynishi ko‘p kuzatiladi. Kasallikka aniq tashxis qo‘yish uchun mikrobiologik va bakteriologik tahlillar zarur.

Ta’kidlanishicha, hozirgacha O‘zbekistonda shokolad orqali salmonellyoz infeksiyasini yuqtirish holatlari qayd etilgani yo‘q. Shunga qaramay, ehtiyot choralari kuchaytirilib, mamlakatga kirib kelayotgan va savdoga chiqarilayotgan barcha shirinliklar qatori, Kinder savdo belgisi ostidagi mahsulotlarning xavfsizligi ham nazoratdan o‘tkazilmoqda.

Eslatib o‘tamiz, ijtimoiy tarmoqlarda “Arnasoy” yozuvi tushirilgan tez tibbiy yordam avtomashinasi yonida bemor zambildan beixtiyor yerga yiqitib yuborilgani aks etgan videolavha tarqalgandi. Sog‘liqni saqlash vazirligi holatga munosabat bildirib, holat tez tibbiy yordam brigadasiga aloqador emasligini ma’lum qilgan.