Andijon viloyati Asaka tumanida fermer xo‘jaliklaridan biriga yer maydoni bo‘yicha sud ishini ijobiy hal etib berish evaziga pul so‘ragan hokimlik yuriskonsulti qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Andijon viloyati boshqarmalari tomonidan Asaka tuman prokuraturasi bilan hamkorlikda tezkor tadbir o‘tkazilgan. Tadbirda tuman hokimligining yuriskonsulti X.Q. “Q.N.” fermer xo‘jaligi ish yurituvchisi B.N.ning ishonchiga kirib, ushbu xo‘jalikning ixtiyoriga berilgan 20,2 gektar yer maydoni bo‘yicha “N.M.” fermer xo‘jaligi o‘rtasidagi Andijon tumanlararo ma’muriy sudida apellyatsiya tartibida ko‘rilayotgan ishni viloyat sudida ishlovchi tanishlari yordamida ijobiy hal qilishni va’da bergani aniqlangan.
U xizmati evaziga 1,5 ming dollar so‘ragan va xizmat xonasida oldindan 1000 dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda maktab balansidagi yerni 10,4 ming dollarga sotib, puliga Gentra olgan soxta organ xodimi ushlangani, Toshkent viloyatida davlat zaxirasidagi yerni 40 ming dollarga sotishga uringan shaxs qo‘lga olingani to‘g‘risida xabar berilgandi.
Izoh (0)