“Respublikada go‘sht, jun va sut yo‘nalishidagi mayda shoxli mollarni ko‘paytirish va tarmoq ozuqa bazasini mustahkamlashga qaratilgan qo‘shimcha chora-tadbirlar to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga muvofiq, qorako‘lchilik tarmog‘ini rivojlantirish bo‘yicha kredit berishning quyidagi tartibi belgilandi:
- kreditlar Markaziy bankning asosiy stavkasiga 4 foizlik bank marjasini qo‘shish orqali hisoblanadigan stavka bo‘yicha ajratiladi;
- tadbirkorlarga xorijdan go‘sht, jun va sut yo‘nalishidagi qo‘y va echkilar xarid qilish uchun – 5 yil muddatgacha, shu jumladan 3 yillik imtiyozli davr bilan;
- tadbirkorlarga ularning ozuqa sexlari (granulyator)ni, go‘sht, jun va sut mahsulotlarini qayta ishlashni tashkil etish bo‘yicha loyihalarini moliyalashtirish uchun – 10 yil muddatgacha, shu jumladan 3 yillik imtiyozli davr bilan;
- xo‘jalik yurituvchi subyektlarga yaylovlarda chorva mollarining suvga bo‘lgan ehtiyojini qondirish uchun suv chiqarish (quduqlar burg‘ilash yoki mukammal ta’mirlash) va suv inshootiga resurs tejamkor uskunalar o‘rnatish uchun – 5 yil muddatgacha, shu jumladan 3 yillik imtiyozli davr bilan.
Avvalroq O‘zbekistonda aholiga 350 ming bosh qo‘y va echki tarqatishga 100 mln dollar yo‘naltirilishi, Shavkat Mirziyoyev 2022-yilda go‘sht, sut va tuxum mahsulotlariga talabni qondirishda birorta hudud rahbarida aniq tasavvur yo‘qligini tanqid qilgani to‘g‘risida xabar berilgandi.
Izoh (0)