O‘zbekistonda 2022-yil 1-yanvardan xarid cheklarini “Soliq” mobil dasturi orqali ro‘yxatdan o‘tkazgan jismoniy shaxslar xarid summasidan 1 foiziga keshbekka ega bo‘lmoqda. Davlat soliq qo‘mitasining ma’lum qilishicha, yil boshidan iste’molchilarga 68,1 milliard so‘m keshbek to‘landi.
Qayd etilishicha, 8-aprel kuni iste’molchilarga mart oyi uchun yana 9,6 milliard so‘m keshbek to‘lab berilgan. 23-aprelda mart oyi uchun 22,7 milliard so‘m, 25—26-aprel kunlari esa yanvar—mart oylari uchun yana 900,3 million so‘m keshbek iste’molchilarga to‘langan. Soliq hisobotlaridagi kamchiliklar tuzatilishi bilan qolgan keshbek summalari ham to‘lab boriladi.
Aprelda yig‘ilgan keshbek summasi 21—25-mayda iste’molchilarga to‘lab beriladi.
Eslatib o‘tamiz, 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR-kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
DSQ ma’lumotiga ko‘ra, endilikda chekda MXIK kodi to‘g‘ri ko‘rsatilgan barcha tovarlar (xizmatlar) uchun keshbek taqdim etiladi. Rad etish to‘liq xarid summasiga (butun chek uchun) emas, balki faqat ma’lumotlar bazasida mavjud bo‘lmagan MXIK kodi ko‘rsatilgan mahsulot (tovar va xizmat)larga nisbatan qo‘llanadi.
Mavzuga doir:
- Buxoroda xarid chekini bermagan savdogar bu haqda soliqchilarga xabar qilgan xaridorni kaltakladi
- “Chek bermayapsan deb 5 million so‘m jarimaga tortishdi”. Ayrimlar mukofot puli olish uchun soliq huquqbuzarliklari haqida xabar bermoqdami?
- O‘zbekistonda soliq huquqbuzarliklari haqida xabar berganlarga 2 mlrd so‘mdan ortiq mukofot pullari to‘lab berildi
Izoh (0)