“Xarid uchun chek so‘rash yomon ish emas” — DSQ raisi o‘rinbosari keshbek va chek atrofidagi “samosud”larga munosabat bildirdi

So‘nggi vaqtda ijtimoiy tarmoqlarda xarid uchun chek so‘ragan fuqarolar “samosud” qilinayotgani to‘g‘risida xabarlar tarqalmoqda. 28-aprel kuni AOKAda bo‘lib o‘tgan matbuot anjumanida Davlat soliq qo‘mitasi raisi o‘rinbosari Jahongir Abdiyev mazkur holatga munosabat bildirdi.

Jahongir Abdiyevning aytishicha, “samosud” normal jamiyatlarga yot tushuncha.

“Samosud” yaxshi tendensiya emas. Hamma davlatlarda buning uchun ma’muriy va jinoiy javobgarlik belgilangan. Rivojlangan jamiyatda “samosud” degan narsa bo‘lishi kerak emas. Chunki davlat va uning o‘rni bor. O‘zimizda shahar bedarvoza emas, degan gap bor-ku. “Samosud” – kimningdir aybdor yoki aybdor emasligini aniqlamasdan turib, unga nisbatan qandaydir chora ko‘rish degani. O‘zimning misolimda aytsam, bir do‘kondan xarid qilgan narsam uchun chek so‘rasam, yomon ish qilgan bo‘lamanmi? Yoki menga chekimni bermadi. Mana shu tadbirkor chekimni bermadi, desam. Bu borib o‘sha tadbirkorga to‘g‘ridan to‘g‘ri jarima qo‘llaniladi, degani emas-ku, — dedi qo‘mita rasmiysi.

“Soliq hamkor” orqali murojaat qilinishi bu murojaat xolos. Bu qonun buzilish holati, degani emas. Murojaatga asosan, u o‘rganiladi. O‘sha savdo shoxobchasi bor yo‘qligi, mahsulot haqiqatda xarid qilingan yoki qilinmagani va boshqa bir qator masalalarda o‘rganish o‘tkaziladi. O‘rganish natijasida agar qonun buzilish holati uchrasa, keyin chora ko‘riladi”, — dedi qo‘mita raisi o‘rinbosari.

Ma’lum qilinishicha, bugungi kunga qadar “Soliq hamkor” orqali fuqarolar tomonidan 46 ming 325 ta murojaat yo‘llangan bo‘lib, shundan 42 ming 796 tasi (92 foiz) chek bermaslik holati bilan bog‘liq. Mazkur murojaatlarning 25 ming 283 tasi o‘rganilgan va ularning 98 foizi (24 ming 637 tasi) o‘z tasdig‘ini topgan.