Iste’molchilarga asossiz hisoblangan to‘lovlarning yarmi miqdorida ichimlik suvi ta’minoti tashkilotidan kompensatsiya talab qilish huquqi berilmoqda

Senatning yalpi majlisida “Ichimlik suvi ta’minoti va oqova suvlarni chiqarib yuborish to‘g‘risida”gi qonun muhokama qilindi. Bu haqda “Daryo” muxbiri xabar berdi.

Qonun bilan Uy-joy kommunal xizmat ko‘rsatish vazirligi ichimlik suvi ta’minoti va oqova suvlarni chiqarib yuborish sohasidagi maxsus vakolatli davlat organi etib, vazirlik huzuridagi Ichimlik suvidan foydalanishni nazorat qilish inspeksiyasi va uning hududiy inspeksiyalari sohada davlat nazoratini amalga oshiruvchi organ ekanligi hamda ularning vakolatlari belgilanmoqda.

Shuningdek, iste’molchilarga asossiz hisoblangan to‘lovlarning yarmi miqdorida ichimlik suvi ta’minoti tashkilotidan kompensatsiya (penya) talab qilish huquqi berilmoqda.

Bundan tashqari, Ichimlik suvidan foydalanishni nazorat qilish inspeksiyasiga oqova suvni chiqarish quvurlariga ifloslantiruvchi moddalarni me’yoridan ortiqcha miqdorda oqizgan shaxslarga nisbatan kompensatsiya to‘lovlarini undirish huquqi berilmoqda.

Qonunda ichimlik suvi ta’minoti tashkilotining tarmoqlari mavjud bo‘lmagan hududlarga ichimlik suvi berish, quvurlardagi va konstruksiyalardagi avariyalar chog‘ida hamda ichimlik suvi ta’minoti tarmoqlarida ta’mirlash-tiklash ishlari amalga oshirilayotganda, shuningdek, favqulodda vaziyatlarda ichimlik suvini transportda yetkazib berilishi nazarda tutilmoqda.

Qonunning hayotga tatbiq etilishi natijasida sohani barqaror rivojlantirish va xizmatlar sifatini oshirishga mo‘ljallangan ta’sirchan huquqiy baza yaratilishiga, nosozliklar oqibatida ichimlik suvi isrof qilinishining oldi olinishiga, iste’molchilar tomonidan ichimlik va oqova suv quvurlariga noqonuniy ulanish holatlarining oldini olishga, iste’molchilar va xizmat ko‘rsatuvchi tashkilotlar o‘rtasida ochiq va teng huquqli mexanizmlar joriy etilishiga erishiladi.

“Aholi sonining o‘sishi hamda urbanizatsiya jarayonlari ichimlik suvi ta’minoti va kanalizatsiya tizimini muttasil rivojlantirib borishni taqozo qiladi. Ushbu qonun sohadagi tarqoqlikka barham berib, yaxlit va samarali tizim yaratilishiga xizmat qiladi”, — deya Senat raisining so‘zlarini keltirmoqda “Daryo” muxbiri.

Qonun senatorlar tomonidan ma’qullandi.