O‘zbekistonda soliq huquqbuzarliklari haqida xabar berganlarga 2 mlrd so‘mdan ortiq mukofot pullari to‘lab berildi
2022-yilning 1-yanvardan 19-martga qadar 6 mingdan ortiq fuqaro tomonidan savdo qoidalarining buzilishi va do‘konlar tomonidan chek berilamayotgani to‘g‘risida murojaat kelib tushdi, deb xabar beradi Davlat soliq qo‘mitasi matbuot xizmati.
Murojaatlar “Soliq hamkor” mobil dasturi orqali qabul qilinmoqda. 19-martga qadar 6017 nafar fuqaro tomonidan savdo va xizmat ko‘rsatish qoidalarining buzilishi yuzasidan 22 111 ta murojaat kelib tushgan.
Qo‘mita murojaatlarning 13 670 tasida tekshiruvlar yakunlangan, 13 411 tasida huquqbuzarliklar to‘liq tasdiqlangan hamda 3455 nafar fuqaroga 2 milliard so‘mdan ortiq mukofot pullari to‘lab berilgan. Murojaatlarning 6773 tasi takroriy kelib tushgani sababli rad etilgan. Hozirda 645 ta murojaat bo‘yicha soliq tekshiruvlari, 1023 tasida o‘rganishlar o‘tkazilmoqda.
Eslatib o‘tamiz, 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
