“Yamalgan ‘yama’lar kamida 2-3 yil turadi”. Toshkentdagi yo‘llar qanday asfalt qilinmoqda?

13-aprel kuni Toshkent shahar hokimiyatida o‘tkazilgan majlisda Jahongir Ortiqxo‘jayev mas’ullarga 10 kun muddatda Toshkentdagi asosiy yo‘llarni ta’mirlash topshirig‘ini berdi. Buning uchun butun shahardagi xususiy va davlat texnikalari jalb qilinishi aytib o‘tildi.

Ma’lumot o‘rnida aytganda, bugungi kunda Toshkent shahri bo‘ylab jami 66 ta markaziy ko‘cha mavjud bo‘lib, shulardan 22 ta eng serqatnov, ta’mirtalab ko‘chalarda asfalt yotqizish ishlari olib borilmoqda.

Buning uchun Toshkent shahar hokimiyati tomonidan bir nechta pudratchilar tanlab olingan. “Daryo” ana shunday pudratchi tashkilotlardan biri — Grand Road Tashkent QK qurilish ishlari bo‘yicha direktori bilan olib borilayotgan ishlar haqida suhbatlashdi.

Toshkent shahridagi yo‘llarni qayta ta’mirlash uchun kunduz kuniga 2 ta brigada tashkil qilganmiz. Ularga 15 ga yaqin maxsus texnika biriktirilgan. Xuddi shunday brigada kechki smenada ham ishlamoqda. Bunda eng asosiy masala — tezlik. Qolaversa, sifatni unutmagan holatda, — dedi Grand Road Tashkent QK qurilish ishlari direktori Ikrom Rizaqulov.

Toshkentda katta kichik chuqurlarni yamash ishlari avval ham ko‘p bora amalga oshirilgan. Ammo yamalgan joylar qisqa vaqt ichida yana chuqurga aylanganini ko‘p ko‘rganmiz. Hozirda olib borilayotgan ishlarga pudratchi tashkilot tomonidan qancha muddat kafolat beriladi?

Bizning hozirgi qilayotgan ishlarmiz joriy ta’mirlash deyiladi. O‘z nomi bilan joriy bo‘lganidan keyin ularga muddat berilmaydi. Biz shunchaki chuqurni ustiga asfalt tashlab yamab ketayotganimiz yo‘q. Avvaliga o‘sha chuqurning atrofi freyzer moslamasida kesib olinadi. Keyin u yer chang, mayda toshlardan tozalanadi. Shundan so‘ng bitum qo‘yiladi va asfalt yotqiziladi. Ana shu usulda avvalgi qilgan asfaltlarimiz 2-3 yildan beri saqlanib turibdi. O‘ylaymanki, hozirgi ishlarimizning ham muddati 2-3 yildan kam bo‘lmaydi. Balki, undan ham ko‘proq bo‘ladi, — deb izoh berdi Ikrom Rizaqulov.

Eslatib o‘tamiz, fuqarolar ham Toshkent shahri yo‘llarini obodonlashtirish ishlariga o‘z hissalarini qo‘shishlari mumkin. Buning uchun yo‘llardagi chuqurliklarni suratga olib, Xalq nazorati elektron portaliga yuborish kerak bo‘ladi.