Avvalroq Ilon Mask Twitter’ni 44 milliard dollarga sotib olishi haqida kelishuvga erishgani haqida xabar berilgan edi.
Mask shaxsan o‘zi kafolatlagan bitimdagi 21 milliard dollarlik kapitalni qanday qoplamoqchi? Bu haqda Bloomberg ma’lum qildi.
50 yoshli Mask ijtimoiy tarmoq tomonidan kafolatlangan 13 milliard dollarni bank moliyalashi va 12,5 milliard dollarni Tesla’ning 170 milliard dollarlik ulushini garovga qo‘yish orqali qoplashini aytdi. Ammo qolgan mablag‘ni qanday to‘lashi haqida ma’lumot bermadi.
Uning pul topishiga shubha yo‘q. Bloomberg Billionaires Index ma’lumotlariga ko‘ra, Mask dunyodagi eng boy odam bo‘lib, uning boyligi 257 milliard dollarni tashkil etadi. Biroq hisob-kitoblarga ko‘ra, uning atigi 3 milliard dollarga yaqin naqd puli va biroz likvid aktivlari bor.
Boshqa investorlar
Maskning bir yo‘li — Twitter’ni sotib olishda unga qo‘shiladigan hamfikr investorlarni topish. Bu kapitalning bir qismi yangi yoki mavjud aksiyadorlardan kelishini anglatadi.
U allaqachon bunday strategiya rejalarida bo‘lishi mumkinligiga ishora qilgan. Twitter’ni sotib olish bo‘yicha o‘zining dastlabki taklifidan so‘ng, Mask TED tadbirida o‘zining niyati qonunda ruxsat etilgan darajada ko‘p aksiyadorlarni saqlab qolish ekanligini bildirgan.
AQSH xususiy kompaniyalari odatda 2000 dan kam aksiyador bilan cheklanadi. Agar tarmoq sotilsa, aksariyat investorlar Twitter’ga egalik qilish huquqidan mahrum bo‘ladi.
Ammo Twitter asoschisi Jek Dorsi kabi yirik aksiyadorlar agar Maskning qarashlariga ishonsa, o‘z ulushlarini kompaniyada saqlab qolishni tanlashi mumkin. Dorsining ulushi deyarli 1 milliard dollarga teng.
Hozirda Mask qimmatli qog‘ozlar bo‘yicha sheriklarni to‘plash va boshqa potensial investorlar bilan muzokaralarni davom ettirish bilan band.
Boshqa tomondan, Maskning TED tadbirida iqtisodiyotga ahamiyat bermasligi haqidagi bayonoti ba’zi potensial investorlarni qo‘rqitishi mumkin.
Aksiyalarni sotish
Mask boshqa sarmoyadorlar bilan kelishuvga erisha olmasa ham o‘z boyliklari — Tesla’dagi ulushi yordamida Twitter’ni sotib olish uchun moliyaviy kuchga ega.
U o‘zining 12,5 milliard dollarlik kreditini qoplash uchun aksiyalarni va’da qilganidan so‘ng ham avtomobil kompaniyasining qariyb 21,6 milliard dollarlik garovga qo‘yilmagan aksiyalariga egalik qiladi.
Ushbu strategiya o‘ziga xos xavflarga ega. Birinchisi, Maskning o‘z aksiyalarining bir qismini sotishi kerakligi haqidagi taxminlar allaqachon uning aksiyalari narxiga ta’sir qildi. Oy boshidan buyon ularning narxi taxminan 8 foizga kamaydi.
Shuningdek, Ilon Mask o‘zining SpaceX va The Boring Company xususiy kompaniyalaridagi ulushlarini sotish mumkin, ammo ularning likvidligi ancha past.
Naqd pul, kripto
Mask Bloomberg Billionaires Index tomonidan hisoblanganidan ham boyroq.
Uning naqd pul hisob-kitobi ommaviy sotiladigan aksiyalar va yangiliklar hisobotlari bilan bog‘liq hujjatlarga asoslanadi, ammo uning shaxsiy moliyasiga oid ko‘p ma’lumotlar ochiqlanmagan.
Uning investitsiyalar portfeli bozordan oshib ketgan bo‘lsa, Mask Bloomberg hisob-kitobidan ko‘ra boyroq bo‘lishi va u 21 milliard dollarni qoplash uchun yangi moliyalashtirish manbalariga muhtoj bo‘lmasligi mumkin.
Mask iyul oyida Bitcoin, Eter va Dogecoin’ga egalik qilganini aytgan. Uning qancha pulga egaligi yoki ularga qancha vaqt egalik qilishi noma’lum bo‘lsa-da, birinchi ikkita kriptovalyuta 2020-yil mart oyidan boshlab mos ravishda 720 foiz va 2600 foizga o‘sdi. Dogecoin esa dushanba kuni Mask Twitterni sotib olishga rozi bo‘lganidan keyin deyarli 30 foizga oshdi.
Avvalroq Ilon Mask doimiy uyi yo‘q ekanligini va do‘stlarinikida yashayotgani haqida xabar berilgan edi.
Izoh (0)