Аввалроқ Илон Маск Twitter’ни 44 миллиард долларга сотиб олиши ҳақида келишувга эришгани ҳақида хабар берилган эди.
Маск шахсан ўзи кафолатлаган битимдаги 21 миллиард долларлик капитални қандай қопламоқчи? Бу ҳақда Bloomberg маълум қилди.
50 ёшли Маск ижтимоий тармоқ томонидан кафолатланган 13 миллиард долларни банк молиялаши ва 12,5 миллиард долларни Tesla’нинг 170 миллиард долларлик улушини гаровга қўйиш орқали қоплашини айтди. Аммо қолган маблағни қандай тўлаши ҳақида маълумот бермади.
Унинг пул топишига шубҳа йўқ. Bloomberg Billionaires Index маълумотларига кўра, Маск дунёдаги энг бой одам бўлиб, унинг бойлиги 257 миллиард долларни ташкил этади. Бироқ ҳисоб-китобларга кўра, унинг атиги 3 миллиард долларга яқин нақд пули ва бироз ликвид активлари бор.
Бошқа инвесторлар
Маскнинг бир йўли — Twitter’ни сотиб олишда унга қўшиладиган ҳамфикр инвесторларни топиш. Бу капиталнинг бир қисми янги ёки мавжуд акциядорлардан келишини англатади.
У аллақачон бундай стратегия режаларида бўлиши мумкинлигига ишора қилган. Twitter’ни сотиб олиш бўйича ўзининг дастлабки таклифидан сўнг, Маск ТЕD тадбирида ўзининг нияти қонунда рухсат этилган даражада кўп акциядорларни сақлаб қолиш эканлигини билдирган.
АҚШ хусусий компаниялари одатда 2000 дан кам акциядор билан чекланади. Агар тармоқ сотилса, аксарият инвесторлар Twitter’га эгалик қилиш ҳуқуқидан маҳрум бўлади.
Аммо Twitter асосчиси Жек Дорси каби йирик акциядорлар агар Маскнинг қарашларига ишонса, ўз улушларини компанияда сақлаб қолишни танлаши мумкин. Дорсининг улуши деярли 1 миллиард долларга тенг.
Ҳозирда Маск қимматли қоғозлар бўйича шерикларни тўплаш ва бошқа потенциал инвесторлар билан музокараларни давом эттириш билан банд.
Бошқа томондан, Маскнинг ТЕD тадбирида иқтисодиётга аҳамият бермаслиги ҳақидаги баёноти баъзи потенциал инвесторларни қўрқитиши мумкин.
Акцияларни сотиш
Маск бошқа сармоядорлар билан келишувга эриша олмаса ҳам ўз бойликлари — Tesla’даги улуши ёрдамида Twitter’ни сотиб олиш учун молиявий кучга эга.
У ўзининг 12,5 миллиард долларлик кредитини қоплаш учун акцияларни ваъда қилганидан сўнг ҳам автомобиль компаниясининг қарийб 21,6 миллиард долларлик гаровга қўйилмаган акцияларига эгалик қилади.
Ушбу стратегия ўзига хос хавфларга эга. Биринчиси, Маскнинг ўз акцияларининг бир қисмини сотиши кераклиги ҳақидаги тахминлар аллақачон унинг акциялари нархига таъсир қилди. Ой бошидан буён уларнинг нархи тахминан 8 фоизга камайди.
Шунингдек, Илон Маск ўзининг SpaceX ва The Boring Company хусусий компанияларидаги улушларини сотиш мумкин, аммо уларнинг ликвидлиги анча паст.
Нақд пул, крипто
Маск Bloomberg Billionaires Index томонидан ҳисобланганидан ҳам бойроқ.
Унинг нақд пул ҳисоб-китоби оммавий сотиладиган акциялар ва янгиликлар ҳисоботлари билан боғлиқ ҳужжатларга асосланади, аммо унинг шахсий молиясига оид кўп маълумотлар очиқланмаган.
Унинг инвестициялар портфели бозордан ошиб кетган бўлса, Маск Bloomberg ҳисоб-китобидан кўра бойроқ бўлиши ва у 21 миллиард долларни қоплаш учун янги молиялаштириш манбаларига муҳтож бўлмаслиги мумкин.
Маск июль ойида Bitcoin, Eter ва Dogecoin’га эгалик қилганини айтган. Унинг қанча пулга эгалиги ёки уларга қанча вақт эгалик қилиши номаълум бўлса-да, биринчи иккита криптовалюта 2020 йил март ойидан бошлаб мос равишда 720 фоиз ва 2600 фоизга ўсди. Dogecoin эса душанба куни Маск Twitterни сотиб олишга рози бўлганидан кейин деярли 30 фоизга ошди.
Аввалроқ Илон Маск доимий уйи йўқ эканлигини ва дўстлариникида яшаётгани ҳақида хабар берилган эди.
Изоҳ (0)