Жаҳон соғлиқни сақлаш ташкилоти (ЖССТ) дунёнинг 12 давлатида болалар орасида келиб чиқиши номаълум бўлган гепатит тарқалгани ҳақида маълум қилди. Мазкур гепатит билан касалланиш бўйича жами 169 та ҳолат қайд этилган, бир бола вафот этган, деб ёзади Reuters.
Ушбу ўткир гепатит билан Буюк Британияда 114 нафар, Испанияда 13 нафар, Исроилда 12 нафар, АҚШда 9 ва Данияда 6 нафар бола касалланган. Шунингдек, Ирландияда бештадан кам, Италия ва Нидерландияда тўртта, Норвегия ва Францияда иккитадан, Руминия ва Бельгияда биттадан касалланиш ҳолатлари аниқланган.
ЖССТ маълумотларига кўра, беморларнинг ёши 1 ойликдан 16 ёшгача. Беморларнинг тахминан ўн фоизига жигар трансплантацияси зарур. ЖССТ номаълум гепатитдан камида битта ўлим юз бергани ҳақида маълумотга эга.
Ташкилот ушбу ҳолатларнинг ҳеч бирида A, B, C, E ва D турдаги гепатит вируслари аниқланмаганини айтди. Камида 74 та ҳолатда аденовирус аниқланган, молекуляр текширув вақтида эса 18 кишида F гуруҳ (41-тоифа) аденовируси аниқланган.
«Тест топширганлар орасида 20 та ҳолатда SARS-CoV-2 аниқланган. Бундан ташқари, 19 кишида SARS-CoV-2 ва аденовирус коинфекцияси аниқланган», — дейилади ташкилот хабарида.
ЖССТ таъкидлаганидек, аденовирус ва бошқа кенг тарқалган инфекцияларнинг олдини олиш бўйича умумий чора-тадбирлар қўлларни мунтазам ювиш ва нафас олиш гигиенасини ўз ичига олади. Ташкилот ЖССТга аъзо давлатларга болаларда ўткир гепатит ҳолатларини текшириш ва улар ҳақида хабар беришни тавсия қилди. Шу билан бирга, ЖССТ Буюк Британия ёки ўткир гепатит ҳолатлари аниқланган бошқа мамлакатлар билан саёҳат ёки савдога чекловлар қўйишни тавсия этмаган.
Изоҳ (0)