Андижон вилоятида эски намунадаги ҳайдовчилик гувоҳномасини янгисига алмаштириши лозим бўлган 183 минг нафар фуқаронинг 87 мингдан ортиғи ҳали ҳам алмаштирмаган. Бу ҳақда вилоят ЙҲХБ томонидан ўтказилган матбуот анжуманида маълум қилинди, дея хабар бермоқда «Дарё» мухбири Умиджон Мамарасулов.
Вилоят йўл ҳаракати хавфсизлиги бошқармаси бошлиғи ўринбосари Дониёр Турғуновнинг маълум қилишича, Вазирлар Маҳкамасининг 2017 йил 2 мартдаги «Миллий ҳайдовчилик гувоҳномасининг ҳамда автомототранспорт воситаси рўйхатдан ўтказилганлиги тўғрисидаги гувоҳноманинг янги намуналарини жорий этиш чора-тадбирлари тўғрисида»ги қарорига асосан вилоятда 182 минг 998 нафар фуқаронинг эски намунадаги ҳайдовчилик гувоҳномаларини пластик шаклдаги гувоҳномаларга алмаштириш белгиланган.
«Қарорга асосан дастлаб ‘права’ларни алмаштиришга 2017 йил 1 октябридан 2020 йил 31 декабрига қадар, яъни 3 йил-у 3 ой муҳлат берилиб, 2021 йил 1 январдан эски намунадаги ҳайдовчилик гувоҳномаси ҳақиқий эмас, деб топилиши кўрсатиб ўтилганди. Бироқ фуқароларимиз белгиланган муддатларда ҳужжатларни алмаштиришмади. Шу сабаб уларга яна-да қулайлик яратиш мақсадида Вазирлар Маҳкамасининг қарорларига асосан юқоридаги қарорга ўзгартиришлар киритилиб, алмаштириш муддати икки маротаба узайтирилди. Шундай бўлса-да шу кунга қадар 182 минг 998 нафар ҳайдовчининг 95 минг 593 нафари алмаштирган холос. Қолган 87 минг 405 нафар фуқаро эса ҳали ҳам алмаштирмаган.
Ачинарлиси, ҳар гал белгиланган муддат яқинлашганда ҳамма бирданига алмаштиришга тушади, муддат чўзилганда эса эътиборсизлик билан қарашяпти. Мисол учун январь март ойлари давомида бир кунда ўртача икки мингга яқин фуқаронинг ҳайдовчилик гувоҳномалари алмаштирилган бўлса, ҳозир саноқли одамларгина келиб, алмаштириб кетяпти», — дейди Дониёр Турғунов.
Изоҳ (0)