Футбол бўйича Осиё Чемпионлар Лигаси гуруҳ босқичи 5-тури доирасида «Насаф» 23 апрель, шанба куни «Ас-Садд» билан баҳс юритди.
Тенг кучлар остида ўтган биринчи бўлимда дарвозалар дахлсиз қолди. Иккинчи 45 дақиқаликда эса томонлар 4 та гол уришнинг уддасидан чиқди. 63-дақиқада Акмал Мозговой Санти Касорланинг хатосидан унумли фойдаланиб, ҳисобни очди. 75-дақиқада Ҳусайн Норчаев бирга-бир вазиятда ажойиб ҳаракат қилиб, ҳисобни 2:0 кўринишига олиб келди. Орадан ҳеч қанча ўтмай Қатар клуби дарвозабони ҳам кучли прессинг натижасида хатога йўл қўйди. Хатодан кейин тўпга эга чиққан Ойбек Бозоров Мозговойни қулай вазиятга олиб чиқди, Акмал эса дублни расмийлаштирди — 3:0. Учрашувга қўшиб берилган дақиқаларда Родриго Табата ҳисобни қисқартиришга эришди.
Шу тариқа «Насаф» «Ас-Садд» устидан ишончли ғалабага эришди. Жамоаларнинг 1-даврадаги ўйинида 1:1 ҳисобидаги дуранг қайд этилганди.
Ушбу ғалабадан кейин «Насаф»нинг очколари сони 8 тага етди, жамоа онлайн жадвалда 1-ўринга чиқиб олди. Гуруҳда иккинчи баҳсда «Ал-Виҳдат» (8) ва «Ал-Файсали» (4) ўзаро баҳс олиб боради.
ОЧЛ
5-тур баҳси
23 апрель, шанба
«Насаф» Ўзбекистон — «Ас-Садд» Қатар 3:1
Голлар: 1:0 — 63 Мозговой, 2:0 — 75 Норчаев, 3:0 — 77 Мозговой, 3:1 — 90+1 Табата.«Насаф»: 35. Абдувоҳид Неъматов, 8.Дилшод Саитов (23.Сардор Саъдуллаев 90), 4.Ҳусниддин Алиқулов, 92.Умарбек Эшмуродов, 2.Алибек Давронов, 7.Шароф Муҳиддинов, 88.Марко Станоевич (18.Баҳром Абдураҳимов 78), 22.Акмал Мозговой, 77.Ойбек Бозоров (30.Азиз Холмуродов 90), 17.Суҳроб Нуруллоев (9.Иван Соловёв 67), 10.Ҳусайн Норчаев (99.Семир Смайлагич 90).
«Ас-Садд»: 22.Мешаал Баршам (1.Саад аш-Шиб 79), 2.Педро Коррея (8.Али Асад 73), 3.Абдулкарим Ҳассан, 6.Тариқ Салмон, 7.Муҳаммад Ваад Альбаяти, 16.Буалим Ҳухи, 10.Ҳасан ал-Ҳайдос, 15.Акром Афиф, 17.Гильерме Торрес (12.Родриго Табата 33), 19.Санти Касорла, 24.Андре Айю.
Огоҳлантиришлар: Давронов 57, Саитов 74.
Изоҳ (0)