Samarqand viloyatida fuqaroga hokimlik zaxirasidagi yerni rasmiylashtirib berish uchun pul talab qilgan shaxs qo‘lga olindi. Bu haqda viloyat Ichki ishlar boshqarmasi xabar qildi.
Qayd etilishicha, Samarqand viloyati IIBga fuqaro X. ariza bilan murojaat qilgan. U bog‘dorchilik bilan shug‘ullanishi uchun Samarqand tumani hududidan yer olmoqchi bo‘lganida Q.X. ismli shaxs bilan tanishib qolganini, u tumanning “Mironqul” mahallasi hududida joylashgan hokimlik zaxirasida bo‘lgan 0,40 gektar yer maydonini sotishini hamda kelgusida tuman kadastr bo‘limida ishlovchi tanishlari orqali mazkur yer maydonini uning nomiga rasmiylashtirib berishini aytganini ma’lum qilgan. Q.X. 20 ming dollari miqdoridagi pullarni talab qilayotganini bildirib, unga nisbatan qonuniy chora ko‘rishni so‘ragan.
Mazkur arizaga asosan, 19-aprel kuni Samarqand viloyati IIB JQB Korrupsiya va iqtisodiy jinoyatlarga qarshi kurashish bo‘limi Yer resurslari talon-taroj qilinishiga qarshi kurashish bo‘linmasi, viloyat prokuraturasi Yer resurslari talon-taroj qilinishini oldini olish bo‘limi hamda tuman prokuraturasi xodimlari hamkorligida tezkor tadbir o‘tkazilgan. Unda Samarqand tumani “Oxalik” MFY hududida X.Q. 20 ming dollar miqdoridagi pullarni ariza muallifidan olgan vaqtida ashyoviy dalillar bilan qo‘lga olingan.
Holat yuzasidan tergovga qadar tekshirish harakatlari olib borilmoqda.
Izoh (0)