Инновацион ривожланиш вазирлиги «Ўзбекистон Республикаси Инновацион ривожланиш вазирлиги ҳузуридаги инновацион ўқув-ишлаб чиқариш технопарклари фаолиятини ташкил этиш тўғрисида»ги Вазирлар Маҳкамаси қарори лойиҳасини муҳокамага қўйди.
Қарор лойиҳасида Тошкент шаҳрида барпо этилган INNO инновацион ўқув-ишлаб чиқариш технопаркини Наманган, Бухоро, Жиззах ва Нукус шаҳарларида 2023—2026 йилларда босқичма-босқич ташкил этиш таклиф қилинмоқда. Бунда, 8 та стартап акселератор, 4 та бизнес инкубатор, 4 та ишлаб чиқариш майдонлари, 12 та коворкинг марказлари фаолиятини йўлга қўйилади.
Ташкил этиладиган технопарклар маҳаллий бюджет ҳамда Ўзбекистон ижтимоий ва ишлаб чиқариш инфратузилмасини ривожлантириш дастури маблағлари ҳисобидан молиялаштирилади.
Белгиланишича:
- Технопарклар резидентлари инновацион маҳсулотларни ишлаб чиқаришни ривожлантириш учун энг қулай шароитларни яратиш мақсадида Ўзбекистон ҳудуди доирасида экстерриториаллик принципи асосида жойлаштирилади;
- Технопаркларни қурилиш ва жиҳозлаш харажатлари 90 фоизи Ўзбекистон ижтимоий ва ишлаб чиқариш инфратузилмасини ривожлантириш дастури, 10 фоизи Қорақалпоғистон Республикасининг республика бюджети ва тегишли вилоятлар маҳаллий бюджетининг маблағлари ҳисобидан қопланади;
- Технопарклар вазирлик муассислигидаги масъулияти чекланган жамият шаклидаги юридик шахс, тизим ташкилоти ҳисобланади ва уларнинг устав капиталидаги давлат улуши бўйича иштирокчи функцияси вазирлик томонидан амалга оширилади;
- Технопаркларга ҳар йили «Бўлажак олим» танлови доирасида ажратиладиган маблағларнинг 30 фоиздан кам бўлмаган миқдори стартап лойиҳаларни эълон қилиш, кўриб чиқиш, танлаб олиш ва муваффақиятли лойиҳаларни молиялаштириш учун йўналтирилади;
- Технопарклар ҳудудида амалга оширилаётган лойиҳалар сони кўпайишига кўра технопарклар тузилмасига, ходимлари сонига ва уларнинг меҳнатига ҳақ тўлаш ҳамда рағбатлантириш миқдорига ўзгартириш киритиш ҳуқуқи берилади;
- Инновацион фаолият билан шуғулланадиган компаниялар билан лаборатория асбоб-ускуналарининг, ишлаб чиқариш, офис хоналарининг ва бошқа хоналарнинг ижараси, кўрсатиладиган хизматлар учун шартнома тузилади ва келиб тушадиган маблағлар тўлиқ ҳажмда тегишлилигича технопарклар тасарруфида қолади;
- Технопарклар резиденти мақомини бериш бўйича алоҳида комиссия ташкил этилади ва вазирлик томонидан тасдиқланади.
Аввалроқ Тошкент вилоятида Татаристоннинг «Химград» технополиси билан ҳамкорликда «Чирчиқ» кимё-индустриал технопарки ташкил этилиши тўғрисида хабар берилганди.
Изоҳ (0)