Ijtimoiy tarmoqlarda Toshkent shahridagi 21-mehribonlik uyi tarbiyalanuvchilari mutasaddilardan yordam so‘rab murojaat qilgani aks etgan videolavha tarqalgandi. O‘zbekistonda Bola huquqlari bo‘yicha vakil Aliya Yunusovaning yozishicha, bu mehribonlik uyi rahbariyati tomonidan ataydan tashkillashtirilgan.
Bu mehribonlik uyi rahbariyati tomonidan mavjud ichki salbiy muammolardan, xususan, bolalarning huquq va erkinliklari, manfaatlarining buzilishi, bolalarga nisbatan zo‘ravonlik holatlaridan e’tiborni chalg‘itish maqsadida tashkil etilgan rejali tadbir ekani ko‘rinib turibdi.Avvalroq Xalq ta’limi vazirligi vaziyat yuzasidan Vazirlar Mahkamasining mutasaddilari, Bolalar bo‘yicha ombudsman, Xalq ta’limi vazirligi rahbariyati, Toshkent shahar hokimi, Milliy gvardiya, shahar prokuraturasi, va tegishli mutasaddilar muassasaga kelgan holda vaziyatni o‘rgangani ma’lum qilgandi. O‘rganishlar natijasida muassasa tarbiyalanuvchilari tomonidan xodimlardan biriga nisbatan e’tiroz kayfiyati shakllangani aniqlangan.Bunga nima sabab bo‘lgani va asl maqsad qandayligini mas’ul organlar o‘rganadi. Bolalar huquqlari bo‘yicha vakil barcha darajadagi bolalarning manfaatlarini himoya qiladi. Vakilning asosiy vazifasi — bolalar huquq va manfaatlarini himoya qilish.
Shuningdek, ijtimoiy himoyaga muhtoj, yetim, ota-ona qaramog‘isiz qolgan bolalarning huquqlarini ta’minlash va himoya qilishga alohida e’tibor qaratilmoqda. Vakil o‘z tashabbusi bilan bola huquqlarining buzilishi, ayniqsa, bolalarga nisbatan zo‘ravonlik holatlari to‘g‘risida o‘zi olgan yoki ommaviy axborot vositalarida yoki ijtimoiy tarmoqlarda e’lon qilingan har qanday ma’lumotni tekshirishga haqli.
19-aprel kuni mehribonlik uyi tarbiyalanuvchilaridan biri ruhiy kasalliklar shifoxonasiga yotqizilgani to‘g‘risida xabar kelib tushdi. 20-aprel kuni shahar ruhiy kasalliklar shifoxonasiga tashrif davomida ushbu ma’lumot o‘z tasdig‘ini topdi. Tarbiyalanuvchi qiz rostan ham tez tibbiy yordam brigadasi orqali olib kelingan, biroq unga mehribonlik uyi vakillari negadir hamrohlik qilmagan. Tarbiyalanuvchilarning tibbiyot muassasasiga joylashtirilishi bo‘yicha bir nechta holatlar sodir bo‘lgani haqida ma’lumot olindi.
21-aprel kuni Bola huquqlari bo‘yicha vakil 21-sonli mehribonlik uyiga tashrif buyurib, uning rahbariyati bilan bolalarning qochib ketishi, tarbiyalanuvchilarning ruhiy kasalliklar shifoxonasiga yotqizilishi, bolalarning ruhiy holatiga ta’sir qiluvchi holatlar, bolalarni qo‘rqitish va ularga do‘stona munosabatda bo‘lmaslik bo‘yicha suhbat o‘tkazilgan, shuningdek, tarbiya jarayonida ruxsat etilmagan usullarni qo‘llash va bola huquqlarining buzilishi uchun javobgarlik mavjudligi aytilgan. Mehribonlik uyi ma’muriyati “Eng yaxshi himoya — hujum” tamoyilidan foydalanishga qaror qildi.
Aliya Yunusova, O‘zbekistonda Bola huquqlari bo‘yicha vakil
Izoh (0)