O‘zbekiston Prezidenti Shavkat Mirziyoyev 28-iyul kuni kam ta’minlangan oilalar hamda mehribonlik uylarida istiqomat qiluvchi bolalarni qo‘llab-quvvatlashga bag‘ishlangan videoselektor yig‘ilishi o‘tkazdi. Bu haqda “Gazeta.uz” xabar qilmoqda.

Foto: “Daryo” /Madina Nurman

Davlat rahbari so‘zi avvalida bugungi yig‘ilishda ota-onasidan ajragan, mehrga muhtoj bolalarni qo‘llab-quvvatlashga qaratilgan ustuvor vazifalarni belgilab olish zarurligini qayd etdi.

“Albatta, har bir go‘dak bu yorug‘ dunyoga kelar ekan, unga hamma ota-onasi bag‘rida yayrab o‘ssin, baxtli-saodatli bo‘lsin, deb tilak bildiradi. Lekin taqdir taqozosi bilan ularning ayrimlari ota-ona mehridan benasib qoladi. Bunday holatda bu norasida bolalarning aslo aybi yo‘q ekanini barchamiz yaxshi tushunamiz, albatta”, — dedi u.

Hozirgi kunda:

  • 13 ta bolalar uyida 560 nafar bola (3-4 yosh);
  • 16 ta mehribonlik uyi va 4 ta bolalar shaharchasida 1,8 ming nafar bola (3 yoshdan 18 yoshgacha);
  • 86 ta maxsus internatda 21 ming nafar bola (7 yoshdan 18 yoshgacha);
  • homiylik, vasiylik, oila patronati asosida 79 ming nafar bola tarbiyalanmoqda.

“Lekin bir o‘zimizga savol beraylik, ushbu mehrga muhtoj bolalar g‘amxo‘rlikni to‘liq his qilyaptimi? Afsuski, yo‘q. Bugun Yunusoboddagi 21-son mehribonlik uyiga borganimda na sohaga mas’ul vazirlik, na hudud sektor rahbarlari bu yerdagi muhit va sharoit bilan ishlamagani ayon bo‘ldi”, — dedi Shavkat Mirziyoyev.

Misol uchun, so‘nggi 10 yilda mehribonlik uylari va bolalar shaharchalarini uy-joyga muhtoj 1 ming 188 nafar bitiruvchilaridan 610 nafariga yoki 51 foiziga uy-joy ajratilgan.

Mehribonlik uylaridagi ta’lim-tarbiya ishlari ham mutlaqo qoniqarsiz. Shuningdek, mehribonlik uylari bitiruvchilarining atigi 1,6 ming nafari yoki 64 foizi ish bilan ta’minlangan. Shu kabi, 2020-yili ixtisoslashgan maktablarni bitirgan 1,5 mingdan ziyod nogironligi bor yoshlarning atigi 264 nafari ishga joylashtirilgan.

Bundan avval O‘zbekistonda 18 yoshga to‘lgan, uy-joyga muhtoj yetim bolalarga yangi qurilgan uy-joylar bepul ajratilishi, O‘zbekistondagi vasiylik, homiylik va patronatga olingan bolalarga 18 yoshga to‘lguniga qadar mahalliy budjetdan 1,2 mln so‘mdan to‘lanishi hamda Toshkentdagi mehribonlik uylari oliygohlarga biriktirilishi haqida xabar berilgandi.