Президент Шавкат Мирзиёев Қашқадарё вилоятига қилган сафари давомида Оилавий болалар уйини ташкил этган, меҳрибонлик уйларидан бир неча болани ўз қарамоғига олган оилалар билан суҳбатда бўлди. Бу ҳақда «Дарё» мухбири хабар бермоқда.
Қашқадарё вилояти 4-меҳрибонлик уйида тарбияланган 136 нафар болалардан, 29 нафари оила ва яқин қариндошларига, 91 нафари оилавий болалар уйларига, 10 нафари таълим муассасасига ўқишга кирганлиги, 5 нафари 18 ёшга тўлганлиги, 1 нафари бошқа муассасасига ўтказилганлиги муносабати билан 2021 йилнинг 27 декабрь куни 4-меҳрибонлик уйининг фаолияти тугатилган.
2021 йил 9 август кунидан 16 та оилавий болалар уйлари ташкил этилиб, 98 нафар бола тарбияланмоқда, шундан 91 нафари меҳрибонлик уйидан ва 7 нафари ИИБ Вояга етмаганлар ижтимоий марказидан қабул қилинган.
Маълумот учун, Хақназаров, Самиев, Норбоев, Чориев, Алланазаров, Қодиров, Исмоилов ва Жўраевлар 5 нафардан, Нажиев, Аралов ва Номозовлар 6 нафардан, Убайдуллаев ва Қуйлиевлар 7 нафардан, Суюновлар 8 нафар, Обидовлар 9 нафар, Хонимовлар 10 нафар тарбияланувчиларни ўз қарамоғига олиб, «Оилавий болалар уйи»ни ташкил этган.
Қашқадарё вилоятида етим ва ота-она қарамоғидан маҳрум бўлганларни уй-жой билан таъминлаш ҳамда муҳтожлар бўйича 24 нафар уй-жой билан таъминланган.
Президент Хонимова ва Холлиевлар оиласи 10 нафар, Суюнов ва Хамидовалар оиласи 8 нафар, Алланазарова ва Тўраевлар оиласи 5 нафар ота-онаси меҳридан айрилган болаларни ўз қарамоғига олганини маънавий жасорат деб атаб, уларга ўз номидан ва бутун халқимиз номидан чуқур миннатдорчилик билдирди.
«Ҳозирги шароитда бу ишларни ҳамма ҳам тушунавермайди. Бунинг жуда катта маънавияти бор. Ким эканлигимизни, ўзлигимизни кўрсатяпсизлар. Ҳаммага намунасизлар. Вақтимиз зиқ бўлсада сизлар билан гаплашаётганимиз бу хурсандчилигимиздан», — деди президент.
«Президент билан учрашувида йиғлаб юбордим, йиғи ўз-ўзидан келди. Улар бизнинг ўқишимиз ҳақида гапирганлари бутун умр ёдимда қоладиган бўлди. Жуда хурсанд бўлди. Кулиб гапираётгандим, барибир йиғлаб юбордим», — дейди Шавкат Мирзиёев суҳбатда бўлган болалардан бири.
Болажонлардан айримлари сўзга ҳам чиқишиб, улар ҳам энтикиб йиғлаб юборишди. Уларга қўшилиб эса, залда турганлар ҳам кўзига ёш олди.
Шунингдек, Шавкат Мирзиёев болажонларга мурожаат қилиб, ҳеч қачон ўксимасликларини, доим ўзига ишонч билан юришларини, яхши ўқиб, тарбия олишларини айтди.
Бундан ташқари, давлат раҳбари болаларга совғалар улашди.
Суҳбат якунида давлат раҳбари оилалар билан бирга суратга тушди.
Эслатиб ўтамиз, 2021 йилнинг 28 июль куни Шавкат Мирзиёев меҳрибонлик уйларини Миллий гвардия масъуллигига ўтказишни таклиф қилган эди.
Давлат раҳбари шу куни кам таъминланган оилалар ҳамда меҳрибонлик уйларида истиқомат қилувчи болаларни қўллаб-қувватлашга бағишланган видеоселектор йиғилишида ота-онасидан ажраган, меҳрга муҳтож болаларни қўллаб-қувватлашга қаратилган устувор вазифаларни белгилаб олиш зарурлигини қайд этганди.
«Албатта, ҳар бир гўдак бу ёруғ дунёга келар экан, унга ҳамма ота-онаси бағрида яйраб ўссин, бахтли-саодатли бўлсин, деб тилак билдиради. Лекин тақдир тақозоси билан уларнинг айримлари ота-она меҳридан бенасиб қолади. Бундай ҳолатда бу норасида болаларнинг асло айби йўқ эканини барчамиз яхши тушунамиз, албатта», — деган эди у.
Шунингдек, президент шароити оғир бўлган меҳрибонлик уйларини Президент Администрацияси, Вазирлар Маҳкамаси, вилоят ҳокимлари оталиққа олиши ҳақида гапирганди.
8 апрель куни Шавкат Мирзиёев Тошкентнинг Олмазор туманига ташрифи чоғида ўтказган видеоселектор йиғилиши давомида мамлакатда умуман етимлар бўлмаса, янада яхши бўлишини таъкидлаган.
Изоҳ (0)