“Yashirmayman, men pul bilan keldim”. Shavkat Mirziyoyev Qashqadaryoga tashrifini Ko‘kdala tumanidan boshladi

Shavkat Mirziyoyev hududlar iqtisodiyoti, aholi turmush sharoitlari bilan tanishish maqsadida Qashqadaryo viloyatiga yetib keldi va tashrifni Ko‘kdala tumanidan boshladi. “Daryo” muxbirining xabar berishicha, davlat rahbari bu yerda tuman faollari bilan uchrashuv o‘tkazmoqda.

“Sizlar bilan Ulug‘ Ramazon oyida ko‘rishib turganimdan xursandman. Har bir viloyatga borishdan avval juda katta tayyorgarlik qilaman. Saylovoldi uchrashuvda ko’p masalalar yuzasidan gaplashgandik. Masalan, Chiroqchini ikkiga bo‘lamiz, shunday bo‘ldi”, — deydi prezident.

Davlat rahbari Qashqadaryo ko‘p jabhalarda orqadaligi, bu yerdagi yashash sharoit uni qoniqtirmasligini aytdi.

“Men doim aytaman metin intizom, deb. Qaror qabul qilish oson, uning amaliy jihatini esa doimiy nazorat qilish kerak. Hozir har bir mahallada uch nafardan prezident vakili bor. Ayollarni ham rozi qilishimiz kerak. Ayolni rozi qilsak oila tinch. Ularga yaratilayotgan hamma imkoniyatlar jamiyatimizda adolat o‘rnatish uchun. Jamiyatimizda tenglikni ta’minlash”, — deya qo‘shimcha qildi Shavkat Mirziyoyev.

Prezident Ko‘kdala tumani haqida gapirib, bu hududda amalga oshirilishi rejalashtirilgan ishlar borligini ta’kidladi.

“Mas’ullar har bir mahallaga kirishdan chiqishni o‘ylashi kerak. Chiqishdan oldin esa kirishni o‘ylash kerak. Yashirmayman, men pul bilan keldim. Uni endi qaysi tuman hokimi nima uchun olishini gaplashamiz. Men bilan ko‘rishganda sizlar savol bersalaringiz nimadir bo‘lsa ham o‘zgaradi. Atrofimdagi mas’ullarga ham insof tegib qoladi. Daraxt eksa ham ko‘karib qoladi, masalan”, — dedi prezident.

Eslatib o‘tamiz, Shavkat Mirziyoyev viloyatda ikki kun — 21—22-aprel kunlari bo‘ladi. Tashrif doirasida prezident klaster va sanoat korxonalarida, fermer xo‘jaligi dalasida bo‘ladi, bunyodkorlik ishlari, mahallalardagi o‘zgarishlar bilan tanishadi. Shuningdek, xalq bilan muloqot, viloyat faollari bilan uchrashuv, qishloq xo‘jaligi va sanoat loyihalari taqdimoti ham rejalashtirilgan.

Davlar rahbari oxirgi marta Qashqadaryoga 2021-yilning dekabrida tashrif buyurib, G‘uzordagi Uzbekistan GTL zavodini ishga tushirish marosimida ishtirok etgandi.