Jamoat transporti — jamoatniki. “Toshshahartransxizmat” matbuot xizmati ma’lumotlariga ko‘ra, birgina Toshkent shahrida ushbu transport tarkibiga kiruvchi avtobuslardan 2021-yilning o‘zida 147 million 225 ming 100 nafar yo‘lovchi foydalangan. Yuz yoki ming emas, millionlab kishini manziliga eltadigan transport xavfsiz, qulay, ishonchli bo‘lishi kerak.
Oxirgi ikki yil — 2021—2022-yillari avtobuslarga oid odamni xavotirga soladigan yo‘l-transport hodisalari haqidagi xabarlar shunchalik ko‘paydiki, aksar yo‘lovchi bu transport vositasidan foydalanish yoki yo‘qligi borasida ikkilanib ham qoldi. “Daryo” so‘nggi ikki yildagi avtobuslar bilan bog‘liq eng ayanchli, qurbonlari bor, atrofdagilar salomatligi va harakat xavfsizligiga xavf tug‘dirgan YTHlarni bir sahifaga jamladi.
Toshkentda avtobus bekatda turgan ikki piyodani urib yubordi
2021-yil 28-aprel kuni soat 13:45 atrofida 86-sonli yo‘nalishda harakatlanuvchi Mercedes-Benz avtobusi ikki piyodani urib yuborgan.“Toshshahartransxizmat” surishtiruviga ko‘ra, voqea quyidagicha bo‘ladi. Haydovchi THAY ko‘chasi bo‘ylab boshqarib borayotgan vaqtda yurak-qon tomir jarrohlik klinikasi bekatida unga nisbatan oldinda ketayotgan transport vositasi keskin to‘xtashi natijasida avtobusni o‘ngga burgan va bekat yonida turgan ikki piyodani urib yuborgan.
Jabrlanuvchi piyodalar N.D va O.L.ga hodisa oqibatida yengil tan jarohati yetgan va 16-tez tibbiy yordam ko‘rsatish shifoxonasiga yetkazilgan.
Yo‘l-transport hodisasi haqidagi xabarda avtobus haydovchisi M.A.ga nisbatan Ma’muriy javobgarlik to‘g‘risidagi kodeksning 133-moddasi (transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi) alomatlari mavjudligini inobatga olib, ma’muriy ish qo‘zg‘atilgani hamda dastlabki tergov harakatlari olib borilayotgani aytilgan.
Isuzu Matiz’ga urilib ketib, ag‘darildi. To‘rt yo‘lovchiga tan jarohati yetdi
2021-yilning 7-may kuni soat 11:15 atrofida Toshkent shahri Sergeli tumanida 130-sonli Isuzu avtobusi ishtirokida YTH sodir bo‘lgan. Qayd etilishicha, 12-avtobus saroyi tasarrufidagi ushbu Isuzu Nilufar 3-tor ko‘chasi bo‘ylab Nilufar chorrahasi tomon boshqarib kelinayotgan vaqtda mazkur chorrahada Matiz rusumli yengil avtomobil uning chap tomoniga kelib urilgan. Natijada avtobus muvozanatni yo‘qotib, ag‘darilgan.Dastlabki ma’lumotlarda ushbu yo‘l-transport hodisasi Matiz haydovchisining yo‘l harakati qoidalarini buzishi natijasida sodir bo‘lgani aytilgan.
Mazkur YTH oqibatida avtobusning to‘rt nafar yo‘lovchisiga tan jarohati yetgan va ular Respublika shoshilinch tez yordam ilmiy markaziga yetkazilib, tez tibbiy yordam ko‘rsatilgan.
Samarqanddagi avtobus va Nexia to‘qnashishi oqibatida yengil mashina haydovchisi vafot etdi
2021-yil 18-may kuni Samarqand viloyatining Bulung‘ur tumanida Nexia-3 hamda avtobus ishtirokida avariya sodir bo‘lgan. Oqibatda yengil avtomashina haydovchisi halok bo‘lgan. Avtobus haydovchisi esa tuman Tibbiyot birlashmasiga murojaat qilgan.
Tafsilotlarga ko‘ra, soat 00:30 larda tumanning “Kichik keldon” MFY hududidan o‘tuvchi 4R-47 ichki avtomobil yo‘lining 16-kilometrida 28 yoshli Nexia-3 haydovchisi rul boshqaruvini yo‘qotishi natijasida qarama-qarshi yo‘nalishga chiqib ketgan va 25 yoshli fuqaro boshqaruvidagi avtobus bilan to‘qnashgan.
Toshkentda ikki avtobus ishtirokida YTH sodir bo‘ldi. Oqibatda bir piyoda halok bo‘ldi
2021-yil 29-may kuni Toshkent halqa yo‘li va Bunyodkor shohko‘chalari kesishmasidagi aylanma ko‘prik ustida ikki avtobus ishtirokida YTH sodir bo‘lgan. Ma’lum qilinishicha, avtobuslardan biri piyodalar o‘tish yo‘lagidan o‘tayotgan fuqarolarga yo‘l berib to‘xtagan paytda uning ortidagi boshqa bir Isuzu haydovchisi o‘z vaqtida tormozlanishni amalga oshira olmay, uning ortiga kelib urilgan.
Dastlabki taxminlarda avariya avtobusning belgilangan me’yordan ortiq tezlikda harakatlangani natijasida kelib chiqqani aytilgan. Avariya oqibatida piyodalardan biri og‘ir ahvolda shifoxonaga yuborilgan. Biroq jabrlanuvchi shifoxonaga yetib borishi bilan vafot etgan.
Samarqandda Damas va avtobus to‘qnashuvi oqibatida ikki yo‘lovchi halok bo‘ldi
Samarqand viloyati Payariq tumanida 2021-yil 1-iyul kuni soat 12:00 larda Damas va avtobus ishtirokida YTH sodir bo‘lgan.
“Eshmonsoq” MFY hududidan o‘tuvchi 4R-48 avtomobil yo‘lining 26-kilometrida Jizzax—Gagarin—Samarqand—Payariq yo‘nalishida aholiga xizmat ko‘rsatuvchi avtobus yo‘liga qarama-qarshi tomondan harakatlanib kelayotgan Damas avtomobilining chiqib ketishi natijasida to‘qnashuv sodir bo‘lgan.
Oqibatda Damas ichida bo‘lgan ikki nafar fuqaro hodisa joyida vafot etgan. YTH haqidagi xabarda holat yuzasidan viloyat IIB huzuridagi Tergov boshqarmasi tomonidan Jinoyat kodeksining 266-moddasi 3-qismi (odamlar o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilgani aytilgan.
Qoraqalpog‘istonda avtobus va yuk mashinasi ishtirokida sodir bo‘lgan YTH oqibatida ikki kishi halok bo‘ldi
2021-yil 14-iyulda Qoraqalpog‘istonda avtobus hamda yuk avtomobili to‘qnashgani haqida xabar berilgan.Qayd etilishicha, Kegeyli tumanidan Nukus shahri tomon harakatlangan Isuzu avtobusiga Chimboy tumanidan aylanma yo‘l orqali harakatlangan “GAZ-5312” yuk mashinasi kelib urilgan.
YTH oqibatida bir kishi voqea joyida vafot etgan, ikki kishi shifoxonaga yotqizilgan. Ta’kidlanishicha, avtobusning ikkinchi yo‘lovchisi ham tuman shifoxonasida vafot etgan.
Avariyaga uchragan transport vositalarining holati o‘rganilganda yuk mashinasi qayta jihozlangani, mavsumiy texnik ko‘rikdan o‘tmagani aniqlangan.
Jizzaxda uxlab qolgan Cobalt haydovchisi Yutong avtobusiga borib urildi. Yengil mashinaning 2 nafar yo‘lovchisi vafot etdi
2021-yil 5-oktabr kuni soat 05:00 larda Sharof Rashidov tumani hududidan o‘tgan xalqaro ahamiyatga ega M39 avtomobil yo‘lining 974-kilometrida Cobalt’ni boshqarib ketayotgan 39 yoshli nukuslik fuqaro o‘zidan oldinda harakatlanib ketayotgan Yutong avtobusining orqa qismiga borib urilgan.
Dastlabki surishtiruv davomida ushbu YTHning kelib chiqishiga Cobalt avtomashinasi belgilangan tezlik me’yorlariga amal qilmagani va haydovchining rul boshqaruvida uxlab qolishi sabab bo‘lgani aniqlangan.
Mashina ichida bo‘lgan ikki yo‘lovchi voqea joyida vafot etgan. Cobalt haydovchisining o‘zi esa o‘ng qovurg‘alari sinishi tashxisi bilan Respublika shoshilinch tibbiy yordam ilmiy markazi Jizzax filialiga yotqizilgan.
Toshkentda avtobus yo‘lning belgilanmagan qismidan o‘tayotgan piyodani urib ketdi. Piyoda voqea joyida vafot etgan
2021-yilning 10-dekabr kuni soat 18:40 larda Yunusobod tumani Amir Temur ko‘chasi “Minor” metro bekati qarshisida haydovchisi T.J. (1990-yilda tug‘ilgan) boshqaruvidagi davlat raqami 01 968 XAA bo‘lgan 72-sonli yo‘nalishli avtobus harakatlanayotgan vaqtida, yo‘lning belgilanmagan qismidan kesib o‘tayotgan piyoda T.U.ni urib yuborgan.
Oqibatda piyoda olgan jarohatlari tufayli voqea joyida vafot etgan. YTH haqidagi xabarda holat yuzasidan Toshkent shahar prokuraturasi tomonidan tergovga qadar tekshiruv o‘tkazilayotgani aytilgan.
Toshkentda avtobus boshqaruvni yo‘qotishi oqibatida 8 ta transport ishtirokida YTH sodir bo‘ldi
2021-yil 12-dekabr kuni Toshkent shahri Chilonzor tumanida 8 ta transport vositasi ishtirokida YTH sodir bo‘lgan. Ma’lum qilinishicha, soat 15:00 da tumanning Do‘mbirobod chorrahasida 70-son marshrut bo‘yicha harakatlanuvchi Isuzu avtobusi haydovchisi harakat paytida boshqaruvni yo‘qotgan.
Oqibatda Labo, Spark, 2 ta Nexia-3, 2 ta Matiz va Lacetti avtomobillari to‘qnashuviga sababchi bo‘lgan. Avtobus va Labo haydovchisiga tan shikasti yetgan. Ularga tibbiy yordam ko‘rsatilgan. Hodisa haqidagi xabarda holat yuzasidan tergovoldi tekshiruvi o‘tkazilayotgani aytilgan.
Qashqadaryoda “Jiguli” avtobus bilan to‘qnashdi. Avtomobil haydovchisi voqea joyida vafot edi
2021-yilning 11-dekabr kuni soat 17:10 larda Qashqadaryo viloyati Nishon tumani hududidan o‘tuvchi 4R-89 avtomobil yo‘lining 31-kilometrida haydovchi T.B. (1988-yilda tug‘ilgan) “VAZ-2103” avtomobilini yuqori tezlikda boshqarayotib, rul boshqaruvini yo‘qotgan va qarama-qarshi yo‘nalishdan harakatlanib kelayotgan haydovchi U.B. (1996-yilda tug‘ilgan) boshqaruvidagi Isuzu avtobusi bilan to‘qnashgan.
Oqibatda “VAZ-2103” avtomobili haydovchisi T.B. og‘ir tan jarohati olib, voqea joyida vafot etgan hamda ushbu avtomobil yo‘lovchisi E.A. (2013-yilda tug‘ilgan) va avtobus yo‘lovchisi M.R. (1973-yilda tug‘ilgan) tan jarohati olib, shifoxonaga yotqizilgan.
YTH haqidagi xabarda holat yuzasidan Nishon tumani IIB huzuridagi TB tomonidan dastlabki tergov harakatlari olib borilayotgani aytilgan.
Toshkentda mast piyoda avtobus bosib ketishi oqibatida halok bo‘ldi
2022-yil 6-yanvar kuni soat 19:50 atrofida Toshkent shahri Olmazor tumani Usta Shirin ko‘chasida yo‘lovchi avtobusi piyodani bosib ketgan. Qayd etilishicha, Isuzu rusumli avtobus haydovchisi (1964-yilda tug‘ilgan, ish staji — 35 yil) 43-sonli yo‘nalishda harakatlanib borayotganda Jomiy qurilish bozori oldidagi svetoforda to‘xtash uchun sekinlashgan. Shu vaqt yo‘l qatnov qismining birinchi bo‘lagida ketayotgan piyoda to‘satdan muvozanatni yo‘qotib, avtobus tomonga yiqilgan.
Oqibatda fuqaro voqea joyida halok bo‘lgan. YTH haqidagi xabarda dastlabki xulosaga ko‘ra, piyodaning mast bo‘lgani va holat bo‘yicha dastlabki tergov ishlari olib borilayotgani aytilgan.
Toshkentda 70 yoshli fuqaro avtobus bosib yuborishi oqibatida vafot etdi
2022-yil 8-mart soat 11:30 da Toshkent shahar Chilonzor tumani Chilonzor ko‘chasida MAN avtobusi haydovchisi S.M. piyodalarni urib yuborishi oqibatida bir kishi halok bo‘ldi.1996-yilda tug‘ilgan haydovchi avtobusni boshqarib ketayotib, tartibga solingan piyodalar o‘tish joyida piyodalarni urib yuborgan. Oqibatda piyoda R.Z. (1952-yilda tug‘ilgan) olgan tan jarohatlari sababli shifoxonada vafot etgan.
Shuningdek, R.Y. ismli fuqaro (2017-yilda tug‘ilgan) bosh sohasi lat yeyishi tashxisi bilan shifoxonaga yotqizilgan.
YTH haqidagi xabarda holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi alomatlari bilan jinoyat ishi qo‘zg‘atilgani aytilgan.
Farg‘onada avtobusni quvib o‘tishga uringan Nexia Isuzu bilan to‘qnashdi. Yengil mashina haydovchisi vafot etdi
2022-yil 19-martda Farg‘ona viloyatining O‘zbekiston tumanida Nexia avtomobili haydovchisi harakat davomida qarama-qarshi yo‘nalishga chiqib, o‘z yo‘nalishida harakatlanib kelayotgan Isuzu avtobusi bilan to‘qnashuv sodir etgan.
Isuzu haydovchisiga ko‘ra, yengil mashina o‘zidan oldindagi avtobus va boshqa bir yengil mashinani quvib o‘tmoqchi bo‘lgan. To‘qnashuvdan keyin Isuzu haydovchisi rulni o‘ngga burib yuborib, daraxtga urilgan. Nexia haydovchisi og‘ir tan jarohati bilan shifoxonaga yetkazilgan, biroq ko‘rsatilgan yordamga qaramay, u vafot etgan.
Qibrayda ikki avtobus poyga o‘ynashi oqibatida ulardan biri Lacetti bilan to‘qnashib ketdi
2022-yil 11-aprel kuni Toshkent viloyati Qibray shahrida Isuzu va Lacetti avtotransport vositalari o‘rtasida to‘qnashuv sodir bo‘lgan. Qayd etilishicha, soat 14:30 atrofida 2-avtobus saroyi filiali haydovchisi X.U Isuzu avtobusini 199-yo‘nalishda Qibray shahri Alisher Navoiy ko‘chasi bo‘ylab boshqarib borayotib, Makro do‘koni qarshisida Lacetti avtomobili bilan to‘qnashgan. Bunda jarohat olganlar yo‘q.
Holat yuzasidan xizmat surishtiruvi o‘tkazilganda haydovchi X.U 2-avtobus saroyi filiali haydovchisi A.F. boshqaruvidagi boshqa bir avtobus bilan o‘zaro poyga o‘ynagani aniqlangan. Yo‘lovchilar va boshqa yo‘l harakati ishtirokchilari hayotini xavf ostiga qo‘ygani uchun har ikki haydovchi bilan filial o‘rtasida tuzilgan mehnat shartnomalari bekor qilingan. YTH haqidagi xabarda avtobusga yetkazilgan zarar aybdor haydovchi tomonidan o‘rnatilgan tartibda undirilishi aytilgan.
Izoh (0)