Ukraina Mariupoldagi harbiylar va fuqarolarni qutqarish uchun u yerda “birga bir” yoki “ikkiga ikki” formatdagi muzokaralarning maxsus raundini o‘tkazishga tayyor. Bu haqda Ukraina prezidenti ofisi rahbarining maslahatchisi va Ukraina delegatsiyasi a’zosi Mixail Podolyak Twitter’dagi sahifasi orqali ma’lum qildi.
“Biz ‘muzokaralarning maxsus raundi’ni Mariupolning o‘zida o‘tkazishga tayyormiz. Birga bir. Ikkiga ikki. Yigitlarimizni, ‘Azov’ni (batalyon — tahr.), harbiylar, tinch aholi, bolalar, tiriklar va yaradorlarni qutqarish uchun”, — deb yozadi Podolyak.
Uning so‘zlariga ko‘ra, Ukraina bu kabi muzokaralarga “oldindan shartlarsiz” rozi.
19-aprel kuni DXR Xalq militsiyasi vakili Eduard Basurin harbiylar Rossiya aviatsiyasi va artilleriyasi yordamida “Azovstal” zavodiga hujum boshlaganini ma’lum qilgandi. Undan oldin Rossiya harbiy idorasi Mariupolda qolgan Ukraina Qurolli kuchlarining askarlari, shuningdek, “Azov” batalyoni a’zolari Rossiya kuchlari tomonidan zavod hududida qurshovga olinganini bildirgandi.
19-aprel kuni Rossiya Mudofaa vazirligi ukrainalik harbiy xizmatchilarga taslim bo‘lishni taklif qilgan, bunga qadar gumanitar koridor ochib, ukrainaliklar zavod hududidan chiqishiga imkon yaratgan. Harbiy idora “qurolini topshirgan barchaning hayoti saqlanib qolishi, xavfsizligi to‘liq kafolatlanishi va malakali tibbiy yordam ko‘rsatilishini” va’da qilgan. Moskvaning ma’lum qilishicha, koridordan hech kim foydalanmagan.
Ukraina prezidenti Vladimir Zelenskiy agar Mariupolda qolgan ukrainalik harbiylar o‘ldirilsa, Rossiya bilan muzokaralarni to‘xtatishi haqida gapirgan. Uning so‘zlariga ko‘ra, shaharda vaziyat og‘ir.
Izoh (0)