Киев тинч аҳоли ва ҳарбийларни қутқариш учун Мариуполда музокаралар ўтказиш таклифи билан чиқди

Украина Мариуполдаги ҳарбийлар ва фуқароларни қутқариш учун у ерда «бирга бир» ёки «иккига икки» форматдаги музокараларнинг махсус раундини ўтказишга тайёр. Бу ҳақда Украина президенти офиси раҳбарининг маслаҳатчиси ва Украина делегацияси аъзоси Михаил Подоляк Twitter’даги саҳифаси орқали маълум қилди.

«Биз ‘музокараларнинг махсус раунди’ни Мариуполнинг ўзида ўтказишга тайёрмиз. Бирга бир. Иккига икки. Йигитларимизни, ‘Азов’ни (батальон — таҳр.), ҳарбийлар, тинч аҳоли, болалар, тириклар ва ярадорларни қутқариш учун», — деб ёзади Подоляк.

Унинг сўзларига кўра, Украина бу каби музокараларга «олдиндан шартларсиз» рози.

19 апрель куни ДХР Халқ милицияси вакили Эдуард Басурин ҳарбийлар Россия авиацияси ва артиллерияси ёрдамида «Азовсталь» заводига ҳужум бошлаганини маълум қилганди. Ундан олдин Россия ҳарбий идораси Мариуполда қолган Украина Қуролли кучларининг аскарлари, шунингдек, «Азов» батальони аъзолари Россия кучлари томонидан завод ҳудудида қуршовга олинганини билдирганди.

19 апрель куни Россия Мудофаа вазирлиги украиналик ҳарбий хизматчиларга таслим бўлишни таклиф қилган, бунга қадар гуманитар коридор очиб, украиналиклар завод ҳудудидан чиқишига имкон яратган. Ҳарбий идора «қуролини топширган барчанинг ҳаёти сақланиб қолиши, хавфсизлиги тўлиқ кафолатланиши ва малакали тиббий ёрдам кўрсатилишини» ваъда қилган. Москванинг маълум қилишича, коридордан ҳеч ким фойдаланмаган.

Украина президенти Владимир Зеленский агар Мариуполда қолган украиналик ҳарбийлар ўлдирилса, Россия билан музокараларни тўхтатиши ҳақида гапирган. Унинг сўзларига кўра, шаҳарда вазият оғир.